Спорт – өркениетті қоғам өмірінің айнымайтын бір бөлшегі. Спортпен айналыспайтын, оны мемлекеттік тұрғыда қолдамайтын мемлекеттер некен-саяқ. Мемлекеттік бюджеттен қомақты қаржы бөле отырып, өркениетті елдер өз спортшыларының өнерін жетілдіреді, жарыстарда жеңуін қалап, жанкүйер болып отырады.
Біздің елдің барлық өңірінде денешынықтыру мен спортқа жіті көңіл бөлінген. Солтүстік Қазақстан облысы әкімдігінің денешынықтыру және спорт басқармасы басшысының орынбасары Асылбек Әбділмановтың айтуына қарағанда, облыс халқының 40 пайызы, яғни 215 мыңнан аса адам спортпен тұрақты түрде айналысады екен.
Бүгінгі таңда облыс орталығын қоса есептегенде Қызылжар өңірінің барлық елді мекенінде 2 951 спорт нысаны, балалар мен жасөспірімдердің 27 спорттық мектебі, интернат-колледж, 25 аулалық және 9 спорттық клуб, сонымен қатар спорттық шеберліктің бір мектебі мен Олимпия резервіне дайындау орталығы бар.
2022 жылы жасөспірімдердің арасында спортқа деген құлшынысты арттыра түсу мақсатымен жаңадан 17 секция ашылған. Отыздан аса жекеменшік залдарға тапсырыс беру арқылы қосымша 3 200 бала спортпен айналысады. Бұл мақсатқа биыл 423,4 млн теңге қарастырылып отыр. Былтыр аудан орталықтары мен аудандағы елді мекендерде жаңадан 28 спорт нысандары ашылды. Атап айтқанда, Ақжар, Қызылжар аудандарында – үш-үштен, Айыртау ауданында – екі, Шал ақын, Есіл, Мүсірепов, Мамлют, Тайынша аудандарында бір-бірден шағын футбол алаңдары жасалды. Ал Жұмабаев ауданында бір хоккей корты, Ақжар мен Есіл аудандарында спорттық және стиритворкаут (көшедегі) алаңдары ашылды.
Биыл денешынықтыру-сауықтыру кешендерінің төртеуінің құрылысы аяқталады. Бұл кешендер Айыртау, Есіл, Жамбыл және Ғ.Мүсірепов аудандарының орталықтарында бой көтермек. Сонымен қатар Тайынша мен Айыртау аудандарының орталықтарында екі жабық хоккей кортының құрылысы жалғасады. Бұлар аудан бюджетінің есебінен тұрғызылса, Шал ақын ауданындағы «Агро Север» ЖШС өз қаражатына Повозочный ауылында да осындай корт тұрғызуды қолға алған. Сондай-ақ «Ауыл – ел бесігі» бағдарламасының шеңберінде биыл Ақжар ауданының орталығы – Талшық ауылында құны 215 млн теңгелік жабық хоккей кортын салу жоспарланған.
Қызылжар қаласында өткен ғасырдың 50-жылдары ашылып, орыс тілінде оқытатын баяғы №1 мектеп-интернат 1997 жылы сол кездегі директоры, елімізге белгілі балуан Жамбыл Тасеменовтің күш салуымен спорт интернат-колледжіне айналған. Содан бері бұл мекеменің қабырғасынан елімізге танымал спортшылар шықты. Соның ішінде үшеуі «Қазақстан Республикасының еңбек сіңірген спорт шебері» атағын алған. Олар – кикбоксингтен 2007 жылы Португалияда өткен әлем біріншілігінің чемпионы, Франция (2003) және Грекияда (2009 ж.) өткен чемпионаттардың күміс жүлдегері Мирас Бірімжанов, велосипедші Алексей Луценко, еркін күрес шебері Нұрғожа Қайпанов.
Осы мектеп-интернаттың ғимараттары барынша ескірген еді. Былтырдан бері оның жанынан 244 орындық жатақхана салына бастады, биыл оның құрылысы аяқталады деп жоспарланған.
Петропавл қаласының орталық стадионы – «Қарасайдың» футбол алаңын UEFA норамалары мен стандарттарына сәйкестендіру де қолға алынды. Бүгінгі таңда оны іске асыратын «ҚазЕуроқұрылыс» компаниясымен 1 млрд 235 млн теңгеге келісімшарт жасалған. Ал «Жастар» стадионы республикалық жарыстар өткізудің стандарттарына сәйкестендіріліп, 117,2 млн теңгеге жасанды шөп төсеу қолға алынды.
А.Әбділмановтың айтуына қарағанда, халықты спортқа жұмылдыру мақсатымен былтыр 230 мың адамды қамтыған 1 200 спорттық-бұқаралық шара өткізілген. «Соның ішінде халық барынша көп қатысқандары халықтық спорт ойындары болды. Оның шеңберінде бес кешенді спартакиада өткізілді. Дәстүрлі түрде өткізілетін «Ақ бидай», «Север» қысқы спорт мерекесі, облыстық «Жастар» спартакиадаларына халықтың ынтасы зор болды», дейді ол. Сонымен бірге «Король ринга» атты бокстан өткізілетін облыстық турнир мен «Қызылжар барысы» атты қазақ күресінің жарыстары – халық арасында барынша кең тарап, танымал болып отыр.
Облыста ауыл шаруашылығының бай құрылымдарын спорт саласына меценат болуға тарту жұмыстары да ұтымды жүргізілуде. Мәселен, Тимирязев ауданындағы «Қуаныш» шаруа қожалығының басшысы Қайырбек Хамзин өз қаражатына волейбол кешенін тұрғызып, оның қабырғасында «Қуаныш» атты әйелдердің волейбол командасы жаттығады. Былтыр осы команда Азия чемпионатында өңірімізге бас жүлде алып келді. Ал олардың демеушісі Қайырбек Хамзин Мәдениет және спорт министрлігінің шешімімен 2022 жылғы «Ең үздік меценат» атағын алды. Ал биыл Ұлттық лиганың чемпионатында команда екінші орын алды. Жуырда команданы облыс әкімі Айдарбек Сапаров құттықтап, Алғыс хат тапсырды.
Сондай-ақ Қызылжар өңірінің «Есіл» атты ерлер волейбол командасы, «Барыс» атты баскетбол командасы республика біріншілігінде екінші орын алған. Осының бәрі – спортқа жіті көңіл бөлудің нәтижесінде қол жеткізіліп отырған табыстар. Солтүстікқазақстандықтардың алдағы уақытта алатын асуы да зор деген үміттеміз. Еліміздің олимпиадалық құрама командаларының кандидаттары қатарына велоспорттан А.Луценко мен А.Захаров, жеңіл атлетикадан М.Литвин, еркін күрестен Н.Қайпанов, бокстан Н.Богданова, дзюдодан Н.Маратова, грек-рим күресінен Д.Каленов енген. Шағын облыс үшін бұл аз емес.
Солтүстік Қазақстан облысы