Былтырдан бастап облыс орталығы мәртебесіне ие болған Қонаев қаласының әлеуметтік-экономикалық дамуы мен сәулеттендірілуі бойынша қарқынды жұмыстар жүргізіліп жатыр. Бұл мақсатқа инвесторлар тарту мәселесі де маңызды рөлге ие.
Соның бірі – «CPG International» компаниясының өкілдерімен кездескен Алматы облысының әкімі Марат Сұлтанғазиев сәулет-құрылыс жобалау сондай-ақ, білім беру және денсаулық сақтау саласындағы жобаларды іске асыру және ынтымақтастықты арттыру мақсатында меморандумға қол қойды.
Өңірге алғаш рет келіп отырған сингапурлық компания өкілдерімен жүздескен Марат Елеусізұлы қаланың 53 жылдық тарихы барын айтып, ендігі кезекте жаңа шаһардың құрылысына ден қоятындықтарын жеткізді.
– 1970 жылы салынған қаланың инфрақұрылымдық әлеуетін жақсарту қажет. Бүгінгі таңда облыс орталығының даму жоспары жасақталды. Бізде ең басты екі жоба бар. Олар: G4 City мен Қонаев қаласы, – деді облыс әкімі.
Сонымен қатар, өңір басшысы келелі кездесудің өтуіне өткен айда аймақ атынан Сингапурға сапар шеккен делегация жұмысының қорытындысы мұрындық болғанын ашып айтты.
Ал Қазақстанға тұңғыш рет келіп тұрған сингапурлықтар облыста атқарылар талай іс бар екенін бағамдап үлгергендіктерін, алдағы 25 жылда ойға алған жоспарларды орындауда өз тараптарынан қандай үлес қосуға мүмкіндіктер барын тізбектеп шыққандығын тілге тиек етті.
– «CPG International» – Азиядағы ең ірі инженерлік компаниялардың бірі. АҚШ, Ұлыбритания, Қытай, Үндістан және тағы басқа мемлекеттерді қоса алғанда, әлемнің 20-дан астам елінде филиалдары бар. Компания әуежайлар, көпірлер, теміржолдар, туннельдер, сауда орталықтары сияқты азаматтық және өнеркәсіптік нысандарды жобалауға және салуға маманданған. Мысалға алатын болсақ, халықаралық Вьетнамдағы «Дананг» әуежайы, «Тан Ток Сенг» ауруханасы және Сингапурдағы «Чанги» әуежайы біздің ықпалымызбен бой көтерген, – деді компанияның бас атқарушы директоры Винсент Ло.
Алматы облысына ат ізін салған «CPG International» кадрларды даярлаумен және дамытумен айналысады және бүкіл әлем бойынша бірнеше университет пен ғылыми институттың серіктесі болып табылады.
Өз кезегінде Марат Елеусізұлы облыстың айшықты әлеуетіне тоқтала келе:
– Облыс аграрлы аймақ болып табылады. Алайда Алматы сынды алып қала мен жақын шетелдермен шекаралас орналасқандықтан логистика, тауар айналымын дамытуға қолайлы жер. Сондай-ақ қандай да бір құрылыс жүргізу үшін де жер жеткілікті. Мәселен, бір ғана G4 City құрылысына 111 мың га жер бөлінген еді. Сол себепті біздің аймақта түрлі ұтымды жобаларды жүзеге асыруға мүмкіндік көп, – деді.
Қос тарап өзара пікір алмасқан соң, алдағы озық жобаларды іске асырмаққа ынтымақтастық туралы меморандумға қол қойды.
Делегация өкілдерін қабылдады
Осы күні Алматы облысының орталығы Қонаев қаласына Нидерланд Корольдігінің делегациясы жұмыс сапарымен келді, деп хабарлайды өңірлік баспасөз қызметі.
Облыстың ауыл шаруашылығы саласындағы әлеуетімен танысып, таяу болашақта екі жақты ынтымақтастықта жұмыс істеуді көздеп келген Нидерланды Корольдігінің өкілдері алдымен облыс орталығының бас жоспарымен танысты.
– Алматы облысының жер көлемі 105 мың шаршы метр, ал тұрғын саны 1,5 млн адамды құрайды. Біздің өлке аграрлы аймақ, мұнда 30 мың ауыл шаруашылығы қожалығы бар, – деді облыс әкімі М.Сұлтанғазиев.
Облыс әкімінің сөзіне сүйенсек, ауыл шаруашылығы жерінің көлемі 4,1 млн гектарды алып жатыр, оның ішінде 466 мың гектары егістікке арналса, 3,5 млн га жайылым жер.
Осы күні облыста 74 жылыжай кешені істеп тұр. Оның 22-сі өндіріске бағытталған. Сондай-ақ аймақ картоп өсіру бойынша республикада екінші орынды алады. Ал ел бойынша құс еті өндірісінің 30 пайызы – облыс еншісінде.
Сондай-ақ аймақ басшысы 55 тауарлы-сүт фермасы жұмыс істеп тұрғанын, жылына 625 мың тонна сүт өндірілетінін және құрғақ түйе сүті экспортқа шығарылатынын да тілге тиек етті.
– Бізде өткен жылы 47 тонна құрғақ түйе сүті ҚХР-ға экспортталды. Алдағы уақытта бұл көрсеткішті 95 тоннаға дейін жеткізу көзделген, – деді Марат Елеусізұлы.
Өз кезегінде Уестланд муниципалитетінің мэрі Бауке Арендс облыстың даму жоспары ерекше ұнағанын жасырмады.
– Сіздердің аймаққа алғаш рет келіп тұрмыз. Елдің қонақжайлылығы бізді тәнті етті. Жаңа ғана таныстырған өңірдің даму жоспары да таңдай қақтырды. Өйткені қала салу мың жылда бір рет болатын жайт, – деген Бауке Арендс өздерінің озық тәжірибелерімен бөлісуге және ауыл шаруашылығы саласында бірлесе жұмыс жасауға әзір екендерін атап айтты. Кездесуден кейін қонақтар облыс аумағында орналасқан жылыжай кешеніне және «Fruit Art» зауыты мен «Байсерке-Агро» АӨК-не барып, тыныс-тіршілігімен танысты.
Алматы облысы