Л.Н.Гумилев атындағы Еуразия ұлттық университетінде Ғылым қызметкерлері күніне орай XV-XIX ғасырлардағы еліміздің ежелгі Еуропа және Америка карталарының галереясы ашылды. Онда аталған жоғары оқу орнындағы Заманауи зерттеулер институтының директоры Мұхит-Ардагер Сыдықназаровтың көп жылдық ғылыми зерттеу еңбегі ұсынылды.
Галереяда көне карталардың 100 көшірмесі қойылды. Мазмұнды іс-шараның ашылуында университет ректоры Ерлан Сыдықов Мемлекет басшысының Мұхит-Ардагер Сыдықназаровты қабылдап, оның атқарған жұмысына жоғары баға бергенін атап өтті.
Одан кейін сөз алған Ғылым және жоғары білім министрлігі Ғылым комитетінің төрағасы Дархан Ахмед-Зәки де ғалымның жемісті қызметіне тоқталып, оған шығармашылық табыс тіледі.
Іс-шара аясында «Қазақстанның үзіліссіз мемлекеттілігі. Қазақ мемлекеттілігі тарих толқынында. XVI-XIX ғасырлардағы Еуропа және Америка карталарындағы Қазақ мемлекеті. Атлас» кітабының авторы Мұхит-Ардагер Сыдықназаров дәріс өткізді. Сондай-ақ ол жиналған қауымға өз еңбегі туралы айтып берді. Ғалым 17 жылдан аса Еуропаның ұлттық және корольдік мұрағатында, кітапхана мен мұражайда, картографиялық орталықтарда және АҚШ кітапханаларында зерттеу жұмыстарын жүргізген. Кітап-атласқа табылған 1 500 көне картаның 130-ы енгізілген. Жинақ 3 тілде дайындалып, елімізде ғана емес, шетелде де таныстырылған.
– Бүгінде Қазақ мемлекетінің ең көне картасы 1540 жыл деп белгіленген. Ол Швейцарияның Базель қаласында табылды. Жалпы, XV-XIX ғасырлардағы Қазақ мемлекетінің картасы барлық студентке әр салада жаңа құзыреттілікті меңгеруге мүмкіндік береді. Бұл түрлі ғылыми және білім беру пәндері аясында еліміздің мемлекеттілігі туралы білімді нығайтуға, патриоттық сезімді қалыптастыруға ықпал етеді. 12 сәуірде Брюссельдегі Еуропарламентте алғаш рет «XV-XIX ғасырлардағы Қазақ мемлекетінің ежелгі Еуропа және Америка карталарының галереясы» таныстырылады. Бұл – тарихи оқиға, – деді профессор.