Батыс Қазақстанмен 5 облысы шекаралас жатқан Ресей Федерациясында дизель отынының бағасы 45%-ға қымбат. Мұндай жағдайда арзан жанармайдың сыртқа кетуі – қалыпты құбылыс. Мысалы, елімізде наурыз айында өткен жылмен салыстырғанда жанар-жағармай тұтыну 15 пайызға өсіп кеткен.
«Қазақстан әлемде жанар-жағармай бағасы ең арзан елдердің қатарына кіреді. Оның үстіне соңғы бес жылда инфляция деңгейіне қарамастан, бензин бағасы – 2,3%, дизель отыны – 5,3% ғана өскен. Сондықтан энергетика министрінің мұнай өнімдерінің жаңа бағасы туралы шығарған бұйрығына түсіністікпен қарау керек», дейді Батыс Қазақстан облысының энергетика және тұрғын үй-коммуналдық шаруашылық басқармасының басшысы Мирас Мүлкәй.
Дәл қазір Батыс Қазақстан облысында жағдай тұрақты, ешқандай шектеу жоқ. Соңғы мәлімет бойынша, облыс аумағындағы мұнай базаларында, жанар-жағармай бекеттерінде 4 100 тонна дизель отыны бар, бұл облыстың 8 тәулік тұтынуына жеткілікті. Сондай-ақ АИ-92 маркалы бензиннің – 3 021 тоннасы (5 күндік қор) және АИ-95 маркалы бензиннің – 712 тоннасы (2 күндік қор) бар.
Батыс Қазақстан облысын дизель отынымен қамтамасыз ету көптен шешілмей жүрген күрделі мәселенің бірі. Бір қызығы, облыста дизель отынын өндіретін «Конденсат» компаниясы бар. Ол жылына 850 мың тонна мұнай өнімін, атап айтқанда, бензин, газойль және дизель отынын шығара алады. Соның ішінде кәсіпорын 200 мың тонна жазғы және қысқы дизель отынын шығаруға қауқарлы. Алайда Қарашығанақ кенішінің дәл үстінде отырған компания шикізатқа зар болып, небәрі 12,2% қуатымен жұмыс істеуде. Биылғы 3 ай ішінде «Конденсат» 26 мың тоннаға жуық мұнай өнімін, соның ішінде 11 мың тоннаға жуық дизель отынын өндірген.
«Бүгінде компанияны тұрақты шикізатпен қамтамасыз ету мәселесін орталық атқарушы органдар қарастырып жатыр» дейді БҚО кәсіпкерлік және индустриалды-инновациялық даму басқармасы бастығының орынбасары Жанна Бекқалиева.