Орал қаласында Батыс Қазақстан облысы ардагерлері арасында вокалды топтардың «Майдан әндері» атты облыстық ән байқауы өтті.
Жеңіс күні қарсаңында Оралдың «Алтын Орда» мәдениет үйінде ерекше сайыс өтті. Батыс Қазақстан облысының әр түкпірінен келген вокалды топтар аға буын әншілерден – ақ жаулықты әжелерден, ақ самайлы ағалардан құралған екен. Олар өздеріне етене таныс майдан әндерін шырқап жарысты. Бұл іс-шараны Батыс Қазақстан облыстық ардагерлер ұйымы қолдап, Орал қаласының мәдениет және тілдерді дамыту бөліміне қарасты «Мәдени-ағарту» бірлестігінің «Жұлдыз» және «Шұғыла» комьюнити орталықтары ұйымдастырды.
– Сұрапыл соғыс жылдары 76 635 батысқазақстандық майданға аттанса, оның 36 548-і елге оралмады. Ақжайық өңірінен 40 адам – Кеңес Одағының Батыры, 6 адам «Даңқ» орденінің толық кавалері атанды. Орал қаласында бірнеше әскери госпиталь ашылып, институт, өнеркәсіп орындары көшіп келді. Орда, Жәнібек аудандары тыл емес, майданның бір бөлігіне айналды. Сондықтан бұл соғыс батысқазақстандықтар үшін етене жақын, ерекше қасиетті. Әр әулетті айналып өтпеген бұл қасірет қайталанбасын! Той тойлап емес, ой ойлайтын, ата-баба рухына тағзым ететін бұл күн бейбітшілік пен ауызбіршіліктің қадір-қасиетін ерекше түсінетін сабақ болсын. Қазақ қашанда өнерімен, күйімен, әнімен рухын көтерген ғой, – деді Батыс Қазақстан облысы әкімінің орынбасары Бақытжан Нарымбетов байқаудың ашылу салтанатында.
Облыстық қоғамдық даму басқармасының басшысы Нұрділдә Ораз бен облыстық ардагерлер ұйымының төрағасы Мақсот Берген де қатысушыларға сәттілік тіледі. Майдан әндері байқауына қалалық іріктеу кезеңінен өткен және Ақжайық, Сырым, Қазталов, Тасқала, Теректі, Бәйтерек, Жәнібек аудандарынан келген 18 вокалды топ қатынасты. Сайыс шарты бойынша олар Екінші Дүниежүзілік соғыс тақырыбындағы бір ән және халық әндерінен бір ән орындады.
Байқауға мәдениет саласының ардагері, «Құрмет» орденінің иегері, Қазақстандық салалық мәдениет, спорт, туризм және ақпарат қызметкерлерінің кәсіптік одағының Батыс Қазақстан облыстық филиалы төрағасы Айдар Батырханов, Қазақстан композиторлар одағының мүшесі, КСРО-ның үздік мәдениет қызметкері, Ақжайық ауданының құрметті азаматы, сазгер Ғұбайдолла Хибашев, Ғ.Құрманғалиев атындағы филармония әншісі, Қазақстан композиторлар одағының мүшесі, «Ерен еңбегі үшін» медалінің иегері, Мәдениет саласының үздігі, Сырым ауданының құрметті азаматы Жаскелең Ғайсағалиев, Ғ.Құрманғалиев атындағы филармония әншісі, Қазақстанның еңбек сіңірген қайраткері Мұрат Әмірханов, Ауған соғысының ардагері, интернационалист жауынгер Беркінғали Ғабделов, облыстық Халық шығармашылығы орталығының жетекші маманы, Мәдениет қайраткері Есенгелді Молдағалиев, Мәдени-ағарту бірлестігі директорының орынбасары Бекей Қанатов қазылық етті.
Өте тартысты өткен ән байқауында бас жүлде «Ардагер» клубының «Ағалар әуені» халықтық вокалдық тобына бұйырды. Қазылар алқасының шешімімен Теректі ауданынан келген «Япурай» әжелер ансамблі – бірінші орынға, Қазталов ауданы Қараоба ауылының «Әжелер шуағы» ансамблі екінші орынға ие болды. Жүлделі үшінші орынды «Бәйтерек» комьюнити орталығының «Жайық толқындары» вокалды тобы жеңіп алды.
Байқауда жүлдері орын алмаса да ерекше көзге түскен топтар да сыйлықтан құр қалмады. Сырым ауданының «Ақ тілеу» вокалдық ансамблі – Кеңес Одағының Батыры Әлия Молдағұлова атындағы арнайы жүлдеге, «Ардагер» клубының халықтық «Әже сәлемі» вокалдық тобы – Кеңес Одағының Батыры Мәншүк Мәметова атындағы арнайы жүлдеге, Жәнібек ауданынан келген «Ақниет» ансамблі Халық Қаһарманы Хиуаз Доспанова атындағы арнайы жүлдеге ие болды.
Сондай-ақ вокалды топтардың музыка сүйемелдеушілері, өзге де қатысушы вокалды топтар алғысхаттармен марапатталды.
Батыс Қазақстан облысы