«Жазушылар одағы - қазақ руханиятының қара шаңырағы, ұлт зиялыларының басын қосқан бірегей құрылым. Ғасырға жуық тарихы бар ұйымда төл мәдениетіміздің дамуына ерекше еңбек сіңірген біртуар тұлғаларымыздың ізі қалған. Жаңа толқын сол ұлыларымыздың ұлағатты жолын лайықты жалғастырып келеді.
…Қалам - киелі құндылық. Сөз құдіреті халықты ыдырата да, біріктіре де алады. Біз қазіргі жаһандану дәуірінде өзге өркениеттерге жұтылып кетпей, егемен ел әрі дербес ұлт ретінде сақталудың қамын ойлауымыз керек. Сондықтан барша қаламгерлеріміздің бірлікті ту етіп, ел мүддесі жолында ұлтты ұйыстыруға адал қызмет етуі өте маңызды.
Бүгінгі алқалы жиында салмақты ой, салиқалы пікір айтылып, сөз зергерлерінің шығармашылығына тың серпін беретін жаңа үрдістерге жол ашылады деп сенемін», деп жазылған құттықтау хатта.
Сондай-ақ Мемлекет басшысы бүгінгі жиында сөз ұстаған қауым келелі ой, салмақты пікір айтады деген үміт білдірген.
«Әдетте «Әдебиет - әдептен басталады» деген қанатты сөз бар. Қаламгер қауымы көптен күткен құрылтайдың әдеп пен әділеттің, пайым мен парасаттың, бірлік пен бәтуалы байламның басалқалы бас қосуы болады деп сенеміз. Құрылтай жұмысына сәттілік тілеймін!», деп жазды министр өзінің Facebook парақшасында.
Айта кетейік, бүгін Алматыда Жазушылар одағының ХVI құрылтайы өтіп жатыр.