Димаш Құдайбергеннің польшалық жанкүйерлері үш жылға жуық уақыт бойы әншінің шығармашылығы мен қазақ мәдениетіне арналған онлайн радиостансаны жүргізіп келеді. Ал былтырдан бастап «Димаш» радиосы қазақ тілі курсын жүргізуді қолға алды. Радионың хабар тарату желісі тек Польша ғана емес, бүкіл Еуропалық одақ елдерін қамтиды.
2020 жылдың тамыз айында Димаш Құдайбергеннің польшалық жанкүйерлері тәулігіне 24 сағат және аптасына 7 күн бойы Димаштың әндерін, Қазақстанның мәдениеті туралы бағдарламаларды ұсынатын онлайн радионы іске қосты. «Димаш» радиосы – заңды түрде тіркелген хабар тарату стансасы. Оның Варшавада онлайн хабар тарату және бағдарламалар мен подкастарды шығаруға арналған жеке студиясы бар. Радиодан Польшада тұратын қазақтармен, Қазақстанда тұратын поляктармен және Димаштың жанкүйерлерімен қызықты сұхбаттар беріледі. Кейбір бағдарламалар екі тілде – поляк және қазақ тілдерінде жазылған.
Соңғы бір жылда «Димаш» радиосы өз эфирінде қазақ тілінің онлайн курсын жүргізе бастады. Ондағы қазақ тілі сабақтарын әлемнің түкпір-түкпірінен келген тыңдармандар пайдалана алады. Ол үшін radiodimash.pl сайтындағы радионы қоссаңыз болғаны. Жаңа сабақтар әр сейсенбі сайын CET 20:00-де көрсетіледі және трансляциядан кейін подкаст ретінде қолжетімді. Бұл материалды өздеріне ыңғайлы уақытта тыңдауына мүмкіндік береді. Сабақты алматылық жас инженер әрі Димаш шығармашылығының жанкүйері Беглан Шарынбай жүргізеді.
«Димаш» радиосының жетекшісі Тереза Какол Польша мен Қазақстанды 4 мың километр бөліп тұрғанын, бірақ ғаламтор ғасырында бұл Димашқа, Димаш арқылы ұлы қазақ халқына деген махаббатқа кедергі келтіре алмайтынын айтты. «Біз Беглан мырзамен онлайн жұмыс істейміз, бейнеконференциялар кезінде барлық тақырыпты талқылаймыз және материалдарды қашықтан жазып аламыз», дейді Тереза Какол.
«Димаш» радиосындағы қазақ тілі сабағының алғашқы нәтижелері жаман емес. «DiVoices» хорының польшалық жанкүйерлері Димаштың «Махаббат бер маған» әнінің мағынасын түпнұсқада айтты. Хор сопрано, альт, тенор және баста шырқалады. Т.Каколдың айтуынша, Димаш әндері түңғыш рет хормен Польшада айтылды. Әннің аранжировкасын танымал пианист Ольга Попова «DiVoices» үшін жазған. Айтылуы қиын қазақ сөздерін меңгеру мақсатында хор мүшелері Б.Шарынбаймен желіде кездесіп, ән мәтінінің түпнұсқасын зерделеп, жүрек сүзгісінен өткізіп жеткізді. «Жүректен шыққан ән жүрекке жетеді. Талант пен таңғажайып дауыс әлемге ортақ. Қазір бұл жобаға Еуропалық одақтың өзге мүше мемлекеттеріндегі тыңдармандар да ықылас таныта бастады», дейді Т.Какол.
«DiVoices» хорындағы әншілердің басым көпшілігі бұрын ән айтпаған. Димаштың дауысының тылсым құдіреті оларды сахнаға алып келген. Аз ғана уақыт ішінде қазақ тілін үйреніп қана қоймай, вокал өнерінің қыр-сырын меңгеруге талпынып жүр. Т.Каколдың айтуынша, радиодағы кәсіби мамандар хор мүшелеріне ырғақты, дикцияны және дауыс шығаруды жаттықтырумен айналысады. Көмейдің қалтарысында жасырынып жатқан әуезді үнді аршып алып, жарыққа шығарып, дұрыс қалыптасуына, дауыстың дұрыс қойылуына септігін тигізіп жүр.