Астанаға АҚШ-тың Аризона университетінің студенттері келді. Олар Л.Н.Гумилев атындағы Еуразия ұлттық университетінде білім алып, алты апта ішінде жазғы мектеп форматында тіл меңгеріп, ұлттық құндылықтарымызбен танысады.
Аризона университетінің студенттеріне арналған оқу бағдарламасын Еуразия университетінің оқытушылары әзірлеген. Мазмұнды оқыту әдістемесі тек академиялық жүктемені ғана емес, сондай-ақ ұлттық мәдениетті зерделеуге арналған аудиториядан тыс сабақтарды да қамтиды. Сонымен қатар аталған жоғары оқу орнының оқытушылары мен еріктілері шетелдік меймандарға Астана мен Ақмола облысының табиғатымен, көркем жерлерімен таныстырып, экскурсия ұйымдастырады.
Шетелдіктерге арналған курстың оқытушысы Айжан Майбалаева АҚШ-тан келген студенттер ұлттық мәдениетіміз бен салт-дәстүрімізге ерекше қызығушылық танытып отырғанын атап өтті. Шетелдік меймандардың сұранысына сәйкес оқу мазмұны елтануға бағытталған.
– Сондай-ақ студенттер қазақ тілін үйренуге ынта білдіріп, қосымша сабақ өткізуді сұрады. Біз қонақтарымызға күнделікті қарым-қатынасқа қажетті қазақ тіліндегі сөздер мен сөз тіркестерін үйретеміз. Сонымен бірге шетелдік студенттерді қазақ тілінің ерекше дыбыстарымен таныстыруды бастап, ең қажетті минималды лексиканы меңгеруге көмектесеміз. Оқу материалдарында халқымыздың тыныс-тіршілігі мен еліміздің әлеуметтік және мәдени дамуы туралы мәлімет молырақ, – деді ғалым.
Аризона университетінің студенті Мейсон Молтби біздің елге бұған дейін де ат ізін салып, Абай атамыздың шығармасымен танысып үлгерген екен.
– Қазақстанға келуге көптен бері қызығып жүрдім. Профессорым маған осында баруды ұсынды. Бір жағынан, қазақ мәдениетімен, дәстүрімен жақын таныссам деп ойладым. АҚШ-та орыс тілі мен шығармашылық жазу және дінтану пәнін оқимын. Болашақта аудармашы болғым келеді. Әсіресе Орта Азия мен Қазақстан қаламгерлерінің әдеби шығармаларын аударсам деймін. Абайды біраз оқып, ерекше әсер алдым. Енді қазақ ақындарының жыр жинақтарын көбірек оқуды жоспарлап отырмын. Еуразия университетінің кампустары ерекше ұнады. Біздің университетте сіздердегі секілді йога, гимнастика және үстел теннисіне арналған залдар жоқ, – деді америкалық студент.
Жазғы мектеп жұмысының қорытындысында шетелдік студенттерге тілдік курсты аяқтау туралы сертификат табыс етіледі.