Биыл Арқа төсінде бой көтерген әсем Астанаға 25 жыл толып отыр. Соған орай Қаламгерлер аллеясында елорда әкімдігі мен Қазақстан Жазушылар одағы Астана қалалық филиалының ұйытқы болуымен «Астана – шабыт арқауы» атты мән-мазмұнға толы мәдени іс-шара өтті.
Асылы, Астананың беделі елдің бас әкімшілік орталығымен, көкпен таласқан биік үйлерімен, көздің жауын алар ғимараттарымен, айнадай жарқыраған түзу жолдарымен, жасыл желек көмкерген саябақтарымен, неше түрлі гүлдің хош иісі аңқыған гүлзарымен ғана өлшенбейді, ондағы зиялы қауымның салмағымен де өлшенеді. Осы жағынан келгенде, кіндік қаланың беті жарық. Өйткені елордада халқымыздың сүт бетіне шығар зиялыларының бір шоғыры жиналған. Олар бас шаһардың алғашқы кірпіші қаланған күннен рухани-мәдени орталыққа айналуына зор үлес қосты.
Халқымыз «әкімі ақынын іздеген ел бақытты» деген сөзді қалай тауып айтқан. Бүгінде елордада Қазақстан Жазушылар одағының 160-тан астам мүшесі тұрады. Олардың арасында қазақ әдебиетінің қазынасын сүбелі туындыларымен байытқан қабырғалы қаламгерлерден бастап, көркем сөз өнеріне енді келген талантты жастар да бар.
Іс-шарада алғашқы болып сөз алған Астана қаласы әкімінің орынбасары Есет Бәйкен елорданың рухани өмірі туралы айта келіп, оның қалыптасуына айрықша еңбек сіңірген ақын-жазушылар туралы ой толғады.
«Қазір елордада ұлт руханиятының бір-бір уығына айналған қаламгерлер тұрады. Олар бас қаланың ғана емес, еліміздің рухани-мәдени өмірінің дамуына аянбай қызмет етті. Астана әкімдігі зиялы қауымды ешқашан назардан тыс қалдырған емес. Жастарды да үнемі қолдап отырады. Осыдан екі жыл бұрын елордалық 30 жас ақын-жазушының жинағы жарық көрді. Жақында республикалық жыр мүшәйрасын ұйымдастырдық. Осындай игі іс-шара жалғасын таба береді. Бүгін біз Астананың 25 жылдығына орай бір топ аға ақын-жазушыға сый-құрметімізді көрсетіп отырмыз», деді қала әкімінің орынбасары.
Сөйтіп, «Астана – шабыт арқауы» атты мәдени іс-шара аясында Төлен Әбдік, Қойшығара Салғараұлы, Ғарифолла Есім, Серік Тұрғынбекұлы, Алдан Смайыл, Мәди Айымбет, Әлібек Асқар, Қайсар Әлім, Қуаныш Жиенбай, Тұрсын Жұртбай, Алтыншаш Жағанова, Шәрбану Бейсенова бастаған 80-ге жуық танымал қаламгерге Астана әкімінің қаржылай гранты табыс етілді. Бұған аға буын қаламгерлер бір серпіліп қалды. Белгілі жазушы, қоғам қайраткері Алтыншаш Жағанова елорданың рухани келбеті мен әлем алдындағы абырой-беделін қалыптастыруға талмай еңбек етіп келе жатқан көркем сөз зергерлеріне құрмет көрсеткен қала әкімдігіне ризашылығын жеткізді.
Осы игі істің басы-қасында жүрген айтулы ақын, Қазақстан Жазушылар одағының Астана қалалық филиалының директоры Дәулеткерей Кәпұлының айтуынша, алдағы елорда мерекесінде осындай сый-құрмет 25 жас ақын-жазушыға көрсетілсе, 25 қазан – Республика күнінде қалған алпысқа жуық қаламгер әкім грантын алады.
«Бұдан 3-4 жыл бұрын Алматыда тұратын барлық қаламгерге Алматы әкімінің стипендиясы табыс етілді. Бізге де бұл ой салды. Содан бері осы мәселені көтеріп келеміз. Жақында Астана әкімі Жеңіс Қасымбектің қабылдауында болғанда, осыны тағы көтердім. Міне, нәтижесін көріп отырмыз. Биыл елордаға 25 жыл толып отыр. Бас қаланың рухани тұрғыдан қалыптасуына қаламгерлер көп еңбек сіңірді. Мұны соған көрсетілген құрмет деп білемін. Бір жағынан, елордадағы барлық ақын-жазушының жағдайы керемет дей алмаймын. Кейбір қаламгердің жұмысы, кейбіреуінің үйі жоқ. Бұл соған сәл де болса демеу. Қандай қоғам болса да, руханият өкілдеріне қолдау қажет. Енді осы іс-шара дәстүрге айналса деп тілеймін!», деді Дәулеткерей Кәпұлы.
Сондай-ақ мәдени іс-шара аясында қала әкімдігінің Орталықтандырылған кітапханалар жүйесі «Астана – бейбітшілік пен жасампаздық мекені» атты кітап көрмесін ұйымдастырды.