Ауызды қу шөппен сүрте бергеннен айналаң гүлденіп кетпейтіні анық. Барды бағалап, жыртықты жамап, тесікті бүтіндей түсу өркениет көшіне ілескен халықтың әрекеті болса керек. Біздің айтпағымыз – еліміздің технологиялық әлеуетінің кішкентай бір бөлігі. Оның әлеуметке тигізіп жатқан аз-кем пайдасын пайымдау.
Технология саласындағы әрбір жылт еткен жаңалықты елең қылмай өту мүмкін емес. Өйткені оның маңызы – күнделікті тұрмыста кәдеге жарауында. Қазір болашақтың ғылыми болжамына бойлау мүмкін емес болып барады. Адам қиялы жеткеннің бәріне қол жеткізе алатынын көріп келеміз. Тіпті футуролог ғалымдарың пайымынша, алда адамдардың өмірінде құпия қалмайтын тәрізді. Бұған қоса алда не болатыны да күні бұрын ескеріліп отырмақ. Біздің елде де мұндай жетістіктердің алғашқы легі төбе көрсете бастады. Мәселен, жуырда «Ұлттық ақпараттық технологиялар» АҚ бір-екі жаңалықтың шетін шығарды. Олардың сөзіне сенсек, алда құжаттардың жарамды мерзімінің аяқталуы туралы, жақындарыңыздың туған күндері тағы басқа маңызды күндер технологияның көмегімен алдын ала, өздігінен ескеріліп отырады.
Олардың айтуынша, әртүрлі құттықтау хаттар мен ескертулер eGov Mobile қосымшасындағы push хабарламалары арқылы жіберіледі. Тіпті, үйлену тойы туралы алдын ала хабардар етілетін көрінеді (хабарлама мерейтойға дейін 3 күн бұрын жіберіледі). Сондай-ақ хабарламалардың мәтіннен басқа, тиісті қосымшаны немесе сервисті ашып, құжатқа қол қоя алатын тетіктер пайда болды.
«Ұлттық ақпараттық технологиялар» АҚ төрағасы Ростислав Коняшкиннің айтуынша, азаматтар белгілі бір мемлекеттік қызметтерді немесе проактивті қызметтер туралы хабарламаларды алу бойынша ұсыныстар алады.
– Қазір Invisible Government тұжырымдамасы аясында мемлекет азаматтарға әртүрлі өмірлік жағдайларда өздігінен көмектеседі, қызметті өз бетінше ұсынады, оның қажеттіліктерін қамтамасыз етеді. Халқымыздың өміріндегі маңызды күндерін еске түсіру үшін біз eGov Mobile қосымшасында push хабарламаларын іске қостық. Онда көптеген функция бар, – дейді ол.
Сонымен қатар eGov Mobile қосымшасы жақын арада хабарландырулардың жаңа санаттарын қоспақ және әдеттегі хабарламалардан өзге ұсынылатын қызметке өту үшін жаңа батырмасы бар проактивті қызметтер қолжетімді болмақ. Мұндай хабарландыруларды Push мобильді қосымшасының «Хабарландырулар» бөлімінен көруге болады. Егер қосымша орнатылмаған болса, 1414 нөміріне хабарласу арқылы қосымшаны жүктеп алуға мүмкіндік бар. Мобильді қосымшаны iOS жүйесін пайдаланушылары App Store платформасынан, сондай-ақ Android жүйесін пайдаланушылары Play Market және App Gallery-ден жүктеуге болады.