Қазақстандық Софья Берульцева Азия чемпионатында ұлттық құрама қоржынына алтын медаль салды, деп хабарлайды Egemen.kz.
21 шілдеде Малайзияның Малакка қаласында WKF каратэден ересектер арасында XIX Азия чемпионаты басталды. Әлемнің 31 елінен 400-ге жуық татами шебері жиналған дүбірлі додада Қазақстанның 19 спортшысы бақ сынап жатыр.
Кумите бағдарламасында Токио Олимпиадасының қола жүлдегері, ұлттық құрама көшбасшысы Софья Берульцева (68 келіден жоғары) өз салмағы бойынша қарсыластарының барлығын жеңіп, чемпион атанды.
Финалға шыққан тағы бір қазақстандық Дидар Әмірәлі күміс медаль еншіледі.
Кумите бағдарламасында Жоламан Биғабыл, ката бағдарламасында Лия Қошқарбаева өз салмақтарында қола жүлделерді қаңжығаларына байлады.
Азия чемпионаты 23 шілдеде аяқталады.