Грекияда өткен Халықаралық экономикалық олимпиадада (IEO) оралдық оқушы Нұрдәулет Хайдар қола медаль жеңіп алды.
24 шілде мен 2 тамыз аралығында өткен әлемдік білім додасына Қазақстан құрамасы онлайн қатысқан болатын. Команда құрамында Орал қаласындағы физика-математика бағытындағы Назарбаев зияткерлік мектебінің 11-сынып оқушысы Нұрдәулет ел намысын абыроймен қорғап шықты. Жалпы нәтижеде Қазақстан командасы 1 күміс, 4 қола медальды қанжығаға байлады.
– Халықаралық олимпиада тапсырмалары республикалық кезеңдегідей болды. Тапсырмаларды орындауға аз уақыт берілді. Бірақ сұрақтың басым бөлігіне сәтті жауап беріп, қола медальға қол жеткіздім. Бұл олимпиада арқылы өзімнің кемшіліктерімді де байқадым. Егер тағы бір мәрте қатысу мүмкіндігі болса, алтын медаль алу үшін бар күшімді саламын, – дейді Нұрдәулет.
«Бұл олимпиада тестілеу, ашық сұрақтар, қаржылық ойын және бизнес кейс кезеңдерінен тұрды. Шәкіртіміздің жетістігіне мектебіміздің экономика пәні мұғалімі Әйгерім Рахымның да үлесі зор», дейді Назарбаев зияткерлік мектебінің баспасөз хатшысы Мөлдір Латифова.