Индустрия және инфрақұрылымдық даму министрлігінің мәлімдеуінше, биыл елімізде 170 өнеркәсіп жобасын іске асыру көзделген. Үшінші тоқсанда Екібастұз маңында жылына 240 мың тонна ферросилиций шығаруға қауқарлы ауқымды өндіріс орнының қызметі жолға қойылмақ. Бұл жыл сайынғы экспорттық табысты шамамен 460 млн долларға ұлғайтуға мүмкіндік беріп, 800 адамды тұрақты жұмыспен қамтуға жол ашпақ. Жоба құны – 92 млрд теңге.
Осы жылы отандық ферроқорытпа өндірушілері Қарағанды облысында өнімділігі жылына 400 мың тонна болатын арнайы кокс шығаратын жаңа зауытта алғашқы өнімді шығара бастайды. Бұл импорттық үлесті жылына 57 млрд теңгеге төмендетіп, сондай-ақ жоғары сапалы отын түріне қол жеткізуге мүмкіндік береді. 261 адамды жұмыспен қамтамасыз етуді көздейтін жобаның құны 43 млрд теңгеге бағаланған.
Қостанайдағы республикалық машина жасау орталығы биыл коммерциялық жүк көліктеріне арналған көпірлердің негізгі компоненттерін өндіру бойынша негізгі өнеркәсіп орталығына айналмақ. Зауыт автоматтандырудың жоғары дәрежесімен ерекшеленіп, халықаралық экологиялық стандарттарға толық сай және жергілікті оқу орындарымен ынтымақтастық орнатқан. Өндіріс кезеңінде мұнда 300-ге дейін адам жұмыс істейді.
2023 жылы отандық автомобиль өнеркәсібіндегі тағы бір айтарлықтай жаңалық – Қостанайда Chevrolet Enix маркалы автокөліктердің өндірісі жүзеге асырылады. Нарықта қозғалтқышы 90 және 132 ат күшіне тең седанның 2 түрі болады. Жылына 30 мың машина шығару көзделіп отыр. Жобаны іске асыруға 23,4 млрд теңге жұмсалып, 400 жұмыс орны құрылады.
Бұған қоса Саран моноқаласында тұрмыстық техниканы, Алматыда алюминий радиаторларын, Қарағандыда жел генераторларына арналған конустық мұнараларды, Қостанайда Jetour, Kia және SsangYong маркалы көліктерді және Павлодарда алюминий дискілерін өндіру жоспарланған. Елімізде азық-түлік қауіпсіздігін қамтамасыз ету үшін макарон өнімдері, сүт және сүт өнімдері, құс еті және басқа да өндіріс түрлерінің ауқымы кеңейтілмек.
Тұтастай алғанда, 2023 жылы 13,2 мың тұрақты жұмыс орнын құру жоспарланып отыр.