Футболдан келесі жылы Германияда өтетін Еуропа чемпионатына іріктеу аясындағы 6-турда Қазақстан құрамасы Солтүстік Ирландия футболшыларын 1:0 есебімен ұтты. 27-минутта Максим Самородов гол соғып, құраманы алға шығарды, деп хабарлайды Egemen.kz.
Н тобында алты матчтан кейін Қазақстан құрамасы 12 ұпай жинап, турнир кестесінде 2-сатыға жайғасты. Қазақстан футболының тарихында біздің құрама бұрын-соңды іріктеу кезеңінде 12 ұпай жинаған емес. Бас бапкер Магомед Адиев баптайтын жігіттер сол белеске шықты. Құрама футболшылар іріктеудің келесі матчын 14 қазанда сырт алаңда Дания құрамасына қарсы өткізеді.