Қазақстан Республикасының Ресей Федерациясындағы Төтенше және өкілетті елшісі Зауытбек Тұрысбеков жақында Удмурт Республикасында болды, деп хабарлады еліміздің Мәскеудегі елшілігінің баспасөз қызметі.
Кездесу барысында елші Удмурт Республикасының президенті А.Волковпен кездесіп, екіжақты сауда-экономикалық және мәдени-гуманитарлық қарым-қатынастарды одан әрі тереңдету мәселелерін талқылады. Тараптар ынтымақтастықтың перспективалы бағыттары деп автомобиль жасау, авиақұрылыс, мұнай-химия, кеме жасау салаларын атап өтті.
Бұл З.Тұрысбековтің Волга бойы федералдық округінің әлеуетімен жақыннан танысу мақсатымен осы аймақты аралауға бағытталған сапарының басы еді. Үстіміздегі жылдың күзінде Астанада Қазақстан мен Волга бойы федералдық округі бизнес өкілдерінің бизнес-форумы болуы да мүмкін. Кездесу барысында елші осы мәселелерді де айтып өтті. Сондай-ақ Қазақстан елшісі пластмасса зауыты, Ижевск механикалық зауыты, “Сарапул-молоко” ААҚ, “Цветы Удмуртии” ААҚ сияқты жетекші кәсіпорындарда болды. Елші Ижевскіде конструктор М.Калашниковпен де кездесті. Даңқты конструктор Қазақстан жәйлі жылы пікірлер білдіріп, өзінің 2003 жылы Президент Н.Назарбаевтың қолынан І дәрежелі “Достық” орденін алғанын мақтанышпен мәлімдеді.