Қазыналы қарттардың ел дамуына қосқан үлесі – телегей-теңіз. Заманның қиын-қыстау шағында қара жұмыстың қамытын киіп, бел жазбай, тізе бүкпей тер төгіп, егін орды, мал бақты. Соның нәтижесінде қамба дәнге, қора малға толды. Білім мен денсаулық саласында да уақытпен санасуды білмеген өз ісінің хас шеберлері халыққа қалтқысыз қызмет етті. Сөйте жүріп, талай баланы өмірге әкеліп, ұлтымыздың ұрпағын көбейткен ардақты әке, асыл аналардың ерен еңбектері өскелең ұрпаққа үлгі-өнеге.
Бүгінде Кеген ауылында мыңнан аса қарт тұрады. Олардың дені – ауыл шаруашылығы саласында сүбелі еңбек еткендер. Мереке қарсаңында солардың жүзден астамына құрмет көрсетілді. Аудандық Мәдениет үйіне жиналған қарияларды Кеген ауылының әкімі Руслан Кеңесжанұлы құттықтап, еліміздің жарқын болашағы үшін төккен тері мен сіңірген еңбегі қашанда құрметке ие екенін атап, алғысын білдірді.
Ауданға танымал ақсақалдармен қатар, тыл ардагерлері Азият Қайыңбаева, Сара Қосаева, Ұлдыкен Сағынбекова, көпбалалы аналар Күләш Мұқанова, Зина Абаева бастаған «Алтын алқа» иегерлері салтанатты іс-шараның құрметті қонағы болып, бір марқайып қалды.
«Айналайын жастар, сендер қазыналы қарттарды құрметтеуден кем болмайсыңдар. Осы құрметке еңбекпен жетіп отырмыз. Ел ырыздығын арттыру жолында аянбай еңбек етіңдер. Бүгін басымыз қосылып, құрбы-құрдастарымды көріп, мәре-сәре болып қалдық. Сый-құрметтеріңе алғысымызды айтамыз», деді тыл ардагері Азият апа.
Мереке қарсаңында балаша қуанған қарттарға аудан өнерпаздары тамылжыта ән салып, күй шертіп, көңілін көтерді.
Алматы облысы