Зауыт жұмысы тоқтайды. Неге?

Отандық кәсіпорынның бас директорының орынбасары – бас инженер Әділет Шошанбасов­тың айтуынша, бұл – күрделі жөн­деу емес. Жыл сайын жүргізі­ле­тін ағымдағы жоспарланған тексеру.

«Зауыттағы технологиялық қон­дырғыларды тексеру жұмы­сын жүргізу 14 қыркүйекке жос­­пар­ланған еді. Алайда оны күзгі егін өнімдерін жинау ке­зінде фермерлерді дизель отынымен қамтуды тоқтатпау үшін 1 қазанға ауыстыруға мәж­бүр болдық. Мұны күрделі жөн­деумен шатастырмау қа­жет. Бұл – технологиялық қондыр­ғы­лардағы бөлшектердің, торап­тардың, механизмдердің мер­зімінен бұрын тозуының ал­дын алуға, жарамдылық мер­зімін ұзартуға бағытталған техно­ло­гиялық жабдықты күту, қада­ға­лау, пайдалану және аз-кем жөн­деуге байланысты іс-шаралар ке­шені. Осыған байланысты зауытта барлық қондырғының жұмысы тоқтатылады. Біз ауа райының жағдайын ескеріп, технологиялық қондырғылар­ды салқын түскенге дейін іске қосуға ниеттіміз», дейді Ә.Шошанбасов.

Оның мәліметінше, қондыр­ғыларды тексеруге мердігер кә­сіп­орындардан 1 600-ге жуық қыз­меткер мен 116 арнайы техниканы жұмылдыру көзделген. Тексеру жұмыстары өнеркәсіп­тік қауіпсіздік саласындағы «Аза­маттық қорғау» туралы заңның талаптарына сәйкес жүргізіледі.

«Бұл кезеңде тұтынушы­лар­ға мұнай өнімдерін жөнел­ту тоқтамайды. Өйткені зауыттың резервуарларында жоспарлы тексеру жұмыстары басталған­ға дейін жинақталған мұнай өнімдерінің жеткілікті қоры бар. Қазір 36 мың тонна көлік жанармайы, 32 мың тонна дизель отыны жинақталды. Ал қазан айында 16 мың тонна бен­зин, 28 мың тонна дизель оты­нын өндіру жоспарланып отыр. Мұнай өнімдерінің негізгі түр­лерін өндіру мен жөнелту Энер­гетика министрлігінің жоспа­рына сәйкес жүзеге асыры­ла­ды», деп мәлім етті Ә. Шошанбасов.

Қазір зауытта жанармай түр­лерімен бірге сұйытылған газ өн­діріледі. Энергетика министр­лігінің жоспарына сәйкес Аты­рау облысына қыркүйек айына – ­5 064 тонна, Батыс Қазақстан ­облысына 2 940 тонна сұйы­тыл­­ған газ бөлінген. Мәселен, ­13 қыр­­күйектегі мәліметке сәй­кес Аты­­рау облысына 3 236 тон­на (64%), Батыс Қазақстан облы­сы­на 1 288 тонна (44%) көлемінде сұ­йытылған газ жөнелтілген.

Алайда мұнайлы өңірде сұйы­тылған газды тұтыну көлемі арт­қаны байқалады. Облыстық энер­гетика және тұрғын үй-ком­муналдық басқармасы басшы­сы­ның орынбасары Марат Қара­малаевтың айтуынша, Атырау­да сұйытылған газды тұтыну қа­жеттілігі 9-10 мың тоннаны құрап отыр.

«Сұйытылған газ Атырау мұ­най өңдеу зауытынан жеткізі­­ле­ді. Авто­көліктермен 100 тонна сұйытылған газ Атырау облыс­ының ішкі нарығына, 100 тоннасы Батыс Қазақстан облысына, ал 300 тоннасы теміржол жолы арқылы Ақмола, Қостанай облыстарына жөнелтіліп жатыр. Облыс әкімдігі сұйытыл­ған газ тапшылығын болдыр­мау мақсатында Энергетика ми­нистрлігіне, зауытқа ұсыныс­хат жолдап, тиісті жұмыстар жүр­гізді. Соның нәтижесінде қа­зір зауыттағы тәуліктік газ өнді­рі­сі 650 тоннаға дейін өсті. Аты­рау облысының ішкі нарығы­на жө­нелтілетін газ көлемі 250 тон­на­ға дейін ұлғайды. Бұл газ құю бекеттеріндегі кезек­ті азай­туға, талонмен босатуды жою­ға бағытталды», дейді М.Қарамалаев.

Оның айтуына қарағанда, об­лыс әкімдігі тарапынан Энер­гетика министрлігіне қосымша газ бөлу жөнінде ұсынысхаттар жолданған. Өңірде күн сайын 200-250 тонна газ тұтынылады. Сондай-ақ «Теңізшевройл» компаниясына сұйытылған газбен қамтамасыз ету жөнінде сұраныс хат жіберілген.

Атырау облысы