Мұнайлы өңірдегі алғашқы қазақ газеті «Ерік» атауымен шыққан. Содан бері бір ғасыр өтті. Осы кезеңде басылымның атауы бірнеше рет өзгерді. Биылғы 1 сәуірде алғашқы нөмірі шыққанына 100 жыл толған өңірлік басылым бүгінде «Атырау» деп аталады.
Ғасыр жасаған газеттің мерейтойы аталып өтіп, бұрынғы ғимаратына, өмірден өткен қызметкерлері тұрған үйлерге ескерткіш тақта орнатылды. Бірнеше қызметкердің есімі көшеге берілді. Өңірдегі басылымдарды біріктіріп отырған «Атырау-Ақпарат» ЖШС ғимаратында газет мерейтойына арналған көрме ұйымдастырылды. Көрмеге басылымның бір ғасырлық белесінен сыр шертетін жәдігерлер топтастырылды. Ал «Қалам ұшындағы ғасыр» атты салтанатты кеште 100 жылдық тарихи шежіре театрландырылған көрініспен әрленді.
«Бір ғасыр бұрын «Ерік» атауымен жарыққа шығып, қоғамдық дамудың әр кезеңіне сай оқырманына тұщымды мақалалар, өңірдің мәселесі мен жетістігін жария еткен газеттің тарихы әлі жалғасады. Бұл газетте тек жергілікті қаламгерлер емес, ұлт әдебиетіне мол мұра қалдырған Асқар Тоқмағамбетов, Зейнолла Қабдолов, Фариза Оңғарсынова, Әбіш Кекілбаев секілді жазушылардың қолтаңбасы бар. Осы кезеңде бірнеше буын алмасты. Газет ұжымы ұдайы облыс тұрғындарының мұң-мұқтажын жоқтап, ар-намысын қорғады. Тұрғындардың әлеуметтік мәселесін батыл көтеріп келеді», деді облыс әкімі Серік Шәпкенов.
Газет ұжымын мерейтойымен құттықтаушылар легі аз болмады. Мемлекеттік кеңесші мен Премьер-министр құттықтау хат жолдады. Әсіресе Астана мен Алматыдан, Қызылорда мен Ақтаудан арнайы құттықтауға келген әріптестердің орны бөлек. Бұрын «Атырау-Ақпарат» медиахолдингіне жетекшілік еткен, қазір «Қазақ газеттері» ЖШС бас директорының орынбасары Ерболат Қамен мен «Айқын-Литер» ЖШС директоры Ысқақ Егембердиевтің жүрекжарды құттықтауы басылым қызметкерлеріне серпін берді. Сондай-ақ «Алатау ақпарат» ЖШС бас директоры Ержан Қалымбайұлы, «Сыр-медиа» ЖШС Аманжол Оңғарбаев, «Маңғыстау Медиа» ЖШС директоры Гүлмира Әбішева құттықтады.
Бұл күні газет қызметкерлері марапатқа ие болды. Бір тобы «Ақпарат саласының үздігі» төсбелгісімен, енді бір шоғыры Сенат пен Мәжіліс төрағаларының алғыс хатымен марапатталды. Бір топ тілшіге облыс әкімінің алғыс хаты берілді.
Атырау облысы