Атырау өңірі әкім сайлауына дайын

Аймақта өткен жиынға Ор­та­лық сайлау комиссия мүшесі Шавхат Өтемісов пен ОСК аппаратының жауапты қыз­мет­керлері қатысты. Сапар­дың алғашқы күні Нұрлан Әбдіров С.Өтебаев атындағы Атырау мұнай және газ университетінің студенттерімен кездесті. Ол елі­міздің сайлау жүйесінде бас­талған саяси реформалар туралы кеңінен әңгімеледі.

Атырау облыстық мәслиха­тының шешімімен Иса­тай, Қызыл­қоға аудан­дарында әкімді тікелей сайлау алғаш рет өткізіледі. Осыған орай Орталық сайлау комиссиясының басшысы Қамысқала ауылдық округінің тұрғындарымен кездесу өткізу үшін Исатай ауданына ат басын тіреді. Ол бірінші кезекте, ауыл тұрғындарының бұрын сайланған ауыл әкімінің атқарған жұмысының сапасы туралы пікірлерін тыңдады. Ауыл тұрғындары оның қызметіне оң баға берді. Тұрғындар ауыл әкімі Рафиғат Тәжиденованың 2021 жылы Атырау облыстық «Үздік ауыл әкімі» байқауында жеңіске жеткенін де атап өтті. Ауылдағы Ардагерлер кеңесінің төрағасы Бекболат Мусиннің пікірінше, әкімнің жұмысы нәтижелі болуы үшін қолданыстағы бюд­жетаралық қатынастарды жетіл­діру арқылы әкімнің қаржылық дербестігін арттыру қажет, бұл өз кезегінде Прези­дент Қасым-Жомарт Тоқаевтың 2023 жылғы 1 қыркүйектегі Қазақстан халқы­на Жолдауымен сәйкес келеді.

Исатай ауданының орталығы Ақ­қыс­тау ауылында жастармен кездесу де мазмұнды өтті. Жастар өздерін тол­ған­дырып жүрген сұрақтарын қой­ды. Мәселен, жас бел­сенді Еркебұлан Зинединов деструктивті діни ағымдар­дың ықпалына қарсы тұру мақсатында тұрғындардың имамдарды сайлауы туралы мәселені көтерді. Жас кәсіпкер Арсен Смайылов, еліміз бойынша электрондық дауыс беруді енгізуді ұсынды, бұл қадам сай­лауға қатысуды арттыру мүмкін екенін пайымдады.

Сондай-ақ ОСК төрағасы Қызыл­қоға ауданы Мұқыр ауылындағы №159 учас­келік сайлау комиссиясының жұ­мы­сымен танысты. Мұқыр ауылдық ок­ру­гі әкімінің қатысуымен ауыл тұ­рғын­дарымен дәстүрлі кездесу өткізіп, алдағы сайлау науқанының маңыз­ды­лығын атап өтті. Тұрғындар сайлан­ған әкімнің жұмысына көңілі толатынын жеткізді. Ауыл тұрғыны, 93 жастағы ақ­сақал Өтеген Ораш көп жұмыс атқа­рыл­ғанын, бірақ ауылды одан әрі бірге дамыту­ды жалғастыру қажетін айт­ты. Ал зейнеткер Ақниет Сахи­дің пікі­рінше, әкім ең алдымен әділ, адал, еңбек­қор болуы және халық алдында бер­ген уәде­сін толық орындауы керек. Білім беру саласының ардагері, қоғам­дық бастамадағы медиатор Қазима Кемел­қызы аудан әкімінің сайлауында ауылдастарын кандидаттардың сайлауалды бағдарламаларын мұқият зерделегеннен кейін ғана белгілі бір кандидатқа дауыс беруге шақырды.

Орталық сайлау комиссия­сының төрағасы Нұрлан Әбдіров Миялы ауы­лында жергілікті сайлау комиссия­ла­рының алдағы сайлауға дайындық барысымен танысты, сондай-ақ №144 сайлау учаскесіне барды.

Қызылқоға ауданының орта­лы­ғында ауыл жастарымен қызықты кездесу өтті. Нұрлан Мәжитұлы өткен және алдағы сайлау науқандары, сайлауды халықаралық байқау, дауыс берудің баламалы тәсілдері және оларды қолданудың шетелдік тәжірибесі туралы айтып берді. Атырау қаласының студенттері арасында өткізілгендей осы кез­десуде де электрондық сауал­дама жүргізілді. Осы екі сауалдаманың нәтижелері жалпы ұқсас болды.

Кездесу барысында жас ауыл тұр­ғын­дары сайлау жүйесінің түрлі мәсе­ле­лері төңірегінде қызу әңгіме өрбіт­ті. Мысалы, Жас­тар орталығының қыз­мет­кері Ризабек Амантай мерзімінен бұрын дауыс беру институтын енгізу мүм­кін­дігіне, ал жас журналист Айсәуле Ардақ­қызы дауыс беру үдерісін цифрлан­дыруға, сайлауда электрондық дауыс беруді енгізуге қызығушылық танытты. Кездесуге қатысушылар сайланатын аудан әкімі қандай қасиеттерге ие болу қажеттігі жайында да өз пікірлерін білдірді. Жастармен жұмыс жөніндегі мамандар – Алтынгүл Айтқалиева мен Айдана Оспан жоғары білімінің, жеткілікті жұмыс тәжірибесінің болуына, сондай-ақ жергілікті қоғамдастықпен өза­ра іс-қимыл жасау қабілетіне тоқталды. Қаржы маманы Думан Нығ­метов пен кәсіпкерлік бөлі­мінің қызметкері Оралбек Отарбай халықпен және жастармен тиімді кері байланыс, оның ішінде әлеуметтік желілердегі байланыс дағдыларын бөліп көрсетті. Дулат Бәйдібек әкім жер­гілікті тұрғындарды жұмыс­пен қамтамасыз етуге қабілеті болуға тиіс деді.

Сондай-ақ Н.Әбдіровтің төраға­лығымен кеңес өтіп, оған облыстық, Исатай және Қызылқоға аудандарының сайлау комиссияларының, жергілікті атқарушы және құқық қорғау органдары­ның басшылары қатысты. Төраға алдағы сайлауға дайындық туралы баяндама жаса­ды. ОСК басшысы аудан әкім­дерін сайлау ерекше екенін, жергілікті сайлау, атқару­шы және құқық қорғау органдарына үлкен жауапкершілік жүк­тейтінін жеткізді. Ол әкім­дік­ке және аумақтық сайлау комис­сияларына мүге­дектігі бар азаматтардың сайлау құқық­тарын қамтамасыз ету, канди­даттарға үгіттік баспа материал­дарын орналастыру үшін жеткі­лікті орын беру, барлық ұйым­дас­тыру мәселелерін жедел шешу жөнінде кешенді шаралар қабылдауды тапсырды.

Атырау облысы