Абайсызда ажал құшты

Ағайындылардың анасы 5 қа­зан күні кешкілік жұмыстан үйі­не оралғанда балаларды таппай қал­ған. Ана жүрегі бір сұмдықтың бол­ғанын сезді ме екен, бірден учас­келік инспекторға хабарласып, да­был қағады. Галицкое ауылының учаскелік инспекторы өзге ауыл тұрғындарымен бірге балаларды іздеуге кіріскен.

«Сол күні сағат 23:00-де елді мекеннен 500 метр жердегі ауыл шаруашылық алқаптарын суаруға арналған жасанды су қоймасынан балалардың мүрделері табылды. Денелерінде зорлық-зомбылық бел­гілері жоқ. Аталған оқиға бойын­ша сот-медициналық сараптама тағайындалды, оның қорытындысы бойынша процессуалдық шешім қабылданады», деді өңірлік полиция департаментінің баспасөз қызметі.

Полицейлер гидротехника­лық құрылыстың айналасы қор­шал­мағанын, ал аумақтың өзінде жа­рық мүлде тартылмағанын анық­та­ды. Суға жақындауға немесе түсу­ге тыйым салатын белгілер де тым аз. «Мұның барлығы жақын ауылда тұратын азаматтардың өміріне зор қауіп төндіріп келген» деген байлам жасады тәртіп сақшыла­ры. Қайғылы оқиғаға байланысты Қылмыстық кодекстің 277-бабы 3-бөлімі және 254-бабы бойынша, яғни «абайсызда екі немесе одан да көп адамның өліміне әкеп соқ­қан құрылыс жұмыстарын жүргізу кезінде қауіпсіздік ережелерін бұзу және қызметтік міндеттерін адал атқармау бойынша» тергеу амалдары жүргізіліп жатыр.

Анықтап білгеніміздей, ағалы-інілі балалар жергілікті орта мек­тепте 3 және 4-сыныптарда оқыған. Ал балалардың өліміне себеп бол­ған жасанды су қоймасы жергілік­ті «Галицкое» ЖШС-на қарай­­ды деді басшысы Александр Каси­цын. 170 мың шаршы метр су сыятын құрылыс 2001 жылы қолданыс­қа берілген. Ол арқылы 347 гектар жердің егістігі суарылып келіпті. Тұтас ауылдың халқын еңбек­пен қамтып отырған серіктестік – елі­міздегі ірі шаруашылықтардың бірі. Мұнда егін, мал және сүт ша­руашылығына мән беріледі. Бір­неше тауарлы сүт фермасы, мал бор­дақылауға арналған заманауи үлгідегі кешендері бар. Шаруа басшысы су қоймасындағы қауіпсіздік ережелерін қалайша қаперден шығарып алғаны таңғалдырады.

Павлодар облысы