Ауыл оқушыларының республикалық олимпиадасы осы жылдың қарашасы мен 2024 жылдың қаңтары аралығында алғаш рет өткізіледі. Аталған бастама қала мен ауыл мектептері арасындағы алшақтықты азайтуға бағытталған.
«Дарын» республикалық ғылыми-практикалық орталығының директоры Ғаждембек Тұрсыновтың айтуынша, олимпиадаға ауыл мектептерінің 9-11 сынып оқушылары қатыса алады. Мұндағы мақсат – еліміздің шалғай елді мекендеріндегі дарынды және талантты балалардың қабілеттерін анықтап, дамыту, халықаралық олимпиадаларға қатысуға ынталандыру.
– Республикалық олимпиадаларда академиялық адалдықты қамтамасыз ету үшін тапсырмалар әр қатысушыға электронды түрде жеке жіберіледі. Олимпиаданың барлық кезеңінде оқушылардың аты-жөні жасырулы тұрады. Әр кезеңнен кейін тапсырмалардың сканерленген нұсқасы, қатысушылардың жұмыстары мен дұрыс жауаптары орталықтың сайтында жарияланады, – дейді «Дарын» республикалық ғылыми-практикалық орталығының директоры.
Жоғарыда аталған қағидалардың барлығы ең беделді әлемдік IMO, IPhO, IChO, IBO, IGeO, IOI және IOL олимпиадаларының ережелеріне сүйеніп жасақталған. Бұл олимпиадаларда жеңімпаз болған отандастарымызға мемлекет тарапынан 500 айлық есептік көрсеткіштен 1500 айлық есептік көрсеткішке дейін қаржылық қолдау көрсетіледі. Биыл 23 оқушы жүлделі орындарға ие болған.
– Отандық оқушылардың осындай жоғары жетістіктерін ескере отырып, халықаралық ұйымдастыру комитеті биологиядан ең беделді әлемдік олимпиаданы 2024 жылы Астанада өткізу туралы шешім қабылдады. Оған 80 елден 330-ға жуық үздік жас биолог қатысады деп күтіліп отыр, – дейді Ғаждембек Тұрсынов.
Оқу-ағарту министрі Ғани Бейсембаев атап өткендей, мұндай ауқымды іс-шараның өткізілуі біз үшін үлкен мәртебе. Әрі бұл еліміздің оқу-ағарту саласындағы үлкен жетістік.
– Пәндік олимпиада – балалардың санасында алғашқы ғылыми ізденістерге жол салатын, болашақ ғалымдарды шабыттандыратын, ғылыммен еркін айналысатын жастар тобын қалыптастыратын ең ауқымды бағдарламалық сайыс. Отандық мектеп оқушыларының беделді олимпиадаларға қатысу рейтингі жеңіс қоржынында медальдар санының көбейгенін, білім сапасының артқанын көрсетеді. Сондықтан республикалық олимпиадалардың әрқайсысының сапалы әрі жоғары деңгейде өтуі маңызды, – дейді Ғани Бейсембаев.
Айта кету керек, елімізде жыл сайын жалпы білім беретін пәндер бойынша мектеп оқушылары арасында олимпиадалар ұйымдастырылады. Оларға 300 мыңға жуық мектеп оқушысы қатысады.