Еліміздің экспорттық әлеуетін арттыру мақсатында IT-аутсорсинг компанияларды қолдауға арналған «Global Outsourcer» бағдарламасының бірінші легі табысты өтті. Акселерациядан өткен 15 команда жалпы құны 158 мың долларды құрайтын 73 келісімшартқа қол жеткізді. Қатысушылардың сату географиясы АҚШ, Канада, Еуропа елдері, Түркия, Аустралия сияқты әлемнің 27 елін қамтиды.
1 тамызда басталған «Global Outsourcer » бағдарламасына қатысуға 50-ден астам өтінім түскен, соның ішінен 20-сы іріктеліп, 15 команда акселерацияны сәтті аяқтады. Бұл компаниялар енді халықаралық нарықтарға шығып, бүкіл әлем бойынша келісімшарт жасасып, экспорттық әлеуетін арттырып жатыр.
– Бағдарлама компанияларға сатылым кезеңдерін, стратегияны және кіріс көзін дамытуға, сондай-ақ келіссөздер жүргізу дағдысын және ұсыныс жасауды үйренуге көмектесті. Қатысушылардың 80 пайызы алғаш рет экспортқа жұмыс істей бастады және бірнеше ай ішінде 27 елде жалпы құны 158 мың доллардан астам табыс тапты. «Upwork» негізгі сату алаңына айналды. Бұл отандық экспорт көлемін арттыруға септігін тигізеді, – дейді Astana Hub басқарушы директоры Таңат Өскембаев.
«Global Outsourcer» акселераторы Қазақстанның экспорт көлемін ұлғайтуға және IT-аутсорсинг компаниялардың әлемдік нарықтағы орнын нығайту бағытында тиімділігін көрсетті.
Жетекші трекер Николай Серкутан мен жетекші сарапшы Максим Толмачев компания беделін қалыптастыру және жаһандық экожүйеге тиімді ену қажеттілігі туралы мәселе көтеріп, әлемдік нарықтардағы жаңа стратегиялардың маңызды екенін айтты. «Әдетте ұсынылатын қызмет пен беделді қалыптастыру үшін көп уақыт пен ақша қажет, бірақ Global Outsourcer бағдарламасының нәтижесінде компаниялар осы кезеңде уақыт пен ресурстарды үнемдей алды», деп атап өтті олар.
Demo Day-де командалар жаңа стратегиясын, сатылым кезеңдері мен жасалған келісімшарттарды көрсете отырып, жобаларын әлеуетті клиенттер мен инвесторларға таныстырды. Yessen&Company бас директоры Азат Есенов Канада және Ұлыбритания нарығындағы табысы туралы айтты. Dara Solutions коммерциялық директоры Жасұлан Ақаев алдағы жоспарымен бөлісті. Ол 2025 жылға қарай компания табысын 500 мың долларға дейін арттыруды көздеп отыр екен.
– Біз негізінен қолданбаларды жергілікті компаниялар үшін ғана жасап жүргенбіз. Осы бағдарлама арқылы халықаралық нарыққа қалай шығу керек екенін білдік. Енді Еуропа мен Оңтүстік-шығыс Азия нарығына бағыт алып жатырмыз. Қазір Германияда келісімшарт жасадық, сондай-ақ кореялық компаниямен келіссөз жүргізіп жатырмыз, – деді Code Union тең құрылтайшысы Демьян Язовский.
«Global Outsourcer»-ге қатысу нәтижесінде А-бизнес, СodeUnion, Arcana Inc, AtyrauTechInvest (ATI), Crocos, Dara Solutions, JaiyqDev, Maxinum Consulting, Qazaqsoft, Singularis, TechWorks, Thousand, Updevision, Yessen & Company, 2up компаниялары экспортқа шықты.
Еске сала кетейік, Мемлекет басшысы Қасым-Жомарт Тоқаев Қазақстанды өңірдегі жетекші цифрлық орталықтардың біріне айналдыру мақсатында 2026 жылға қарай IT-экспорт көлемін 1 млрд долларға дейін арттыру міндетін қойған болатын. Astana Hub-тың барлық бастамасы осы стратегиялық мақсатқа жетуге бағытталған құралдар.