Мұқан Төлебаев мұрагерлері

Концерттік бағдарламада отандық композиторлардың әр буын өкілдерінің шығармалары ұсынылды. Әсіресе М.Төле­баев­тың «Қозы Көрпеш – Баян сұлу» операсынан үзінді, сон­дай-ақ композитордың «Тос мені, тос», «Кестелі орамал» секілді танымал романстары орындалды. А.Жұбанов пен Л.Ха­мидидің «Абай» операсы­нан «Абайдың» ариясы, Ә.Қазақбаевтың «Жам­был жырау» операсынан «Сүйінбайдың» термесі, А.Жа­йымов пен А.Жа­йымның «Бей­барыс» операсынан «Бей­ба­рыс­тың» ариясы, А.Мұ­хит­диннің «Әл-Фараби» операсынан «Гүлдер биі» шырқалды. Со­нымен бірге В.Стригоцкий-Пак­тің «Кенесары» симфо­ния­лық поэмасы мен Б.Қыдыр­бек­тің «Реквиемі» және Б.Дәл­ден­байдың «Ел бақыты» атты во­калды-симфониялық одасы тарту етілді.

Классикалық музыка әуелеген кеште «Астана Операның» талантты солистері – Қазақстанның еңбек сіңірген қайраткерлері Азамат Жылтыркөзов, Жанат Шыбықбаев, Мейір Байнеш, «Құрмет» орденінің иегері Ай­зада Қапонова, халықаралық байқаулардың лауреаттары Гүл­жанат Сапақова, Мәдина Ис­ламова, Бейімбет Таңарықов, Рамзат Балакишиев, Ержан Саи­пов, Артур Габдиев, Ал­тын­бек Әбілда, Айгерім Аман­жолова, Нарұл Тойкенов секілді өнерпаздар орындаған туындылар тыңдармандарды әдемі әсерге бөледі. Концертке арнайы шақырылған скрипкашы Еркебұлан Сапарбаев пен вокалист Дильназ Омарханованың өнері де көрермендерді тәнті етті. Аталған өнер ордасының хоры мен симфониялық оркестрі орындаған шығармаларды жұрт­­шылық өте жылы қабыл­дады. Оркестрге Қазақстанның еңбек сіңірген қайраткері Абзал Мұ­хитдин мен Руслан Баймурзин дирижерлік етті.

Айта кетейік, өнер кешінде сахнада екі бірдей сүйекті туын­ды таныстырылды. Оның бірі – талантты жас композитор Әлі­би Әбдінұровтың осы кон­цертке жазған оркестр мен скрип­каға арналған музы­ка­лық шығармасы болса, екін­шісі – композитор Серікжан Әбді­нұровтың «Фараб-Отырар» вокалдық-сим­фониялық дастаны. Екі шы­ғарма да шынайылығымен тың­дармандардың көңілінен шықты.