Нұрали Амангелдиев Бородулиха ауданы Жезкент кенті мектеп-лицейінің 8-сыныбында оқиды. Жаңалыққа жаны құштар жас өрен жақында сыбайлас жемқорлыққа қарсы ой қалыптастыратын «Сатылмайтын Алпамыс» атты компьютерлік ойын жобасын әзірлеп, жұртты елең еткізді.
Нұрали осы жұмысын алғаш рет ұйымдастырылған сыбайлас жемқорлыққа қарсы жобалардың І республикалық байқауына ұсынғаны сол, оқушының ерекше жобасы үздік бағаланып, «Сыбайлас жемқорлыққа қарсы медиақұралдар» бағыты бойынша 1 млн теңге көлемінде ақшалай сыйлықпен марапатталды. Балаңдығына қарамай, қоғамдық кереғар құбылысты тежеу үшін тер төккен еңбегінің еш кетпегенін білдірсе керек.
Алдымен айтайық, Нұралидің жаңа ойын жобасына жетекшілік еткен анасы Наталья Геннадиевна информатика пәнінен аталған білім ошағында қазақ және орыс тілдерінде сабақ береді. Алғашында «жақсыны көрмекке» дегендей, жоба авторының өзімен тілдеспек болып әкесіне қоңырау шалғанымызда, оның «Балдәурен» демалыс лагерінде екенін естідік. Әкесі Алматыда жұмыс бабымен жүргенін, мүмкіндік болса, анасы Натальямен хабарласуды сұрап, «қазақшасы менен жақсы» деп әзілдеп қойды. Дегенмен әзіл болғанымен, шындығында солай екен. Наталья Елубаеваны ұлының жеңісімен құттықтағанымыз сол, әңгіме тиегін қазақша ағытып қоя берді.
«Нұралидің бұл жобасын «Сатылмайтын Алпамыс» деп атауының да өз мәнісі бар. Бәрімізге белгілі «Алпамыс мектепке барады» деген киноны ол да үнемі қызығып көретін. Жасаған жобасының негізгі идеясы – білім алушылардың бойында сыбайлас жемқорлыққа қарсы мінез-құлық дағдыларын, күнделікті өмірде сыбайлас жемқорлық көріністеріне төзбеушілікті қалыптастыру. Соны жүзеге асырудағы ойларын осы фильмнен тапты», дейді Н.Елубаева.
Сыбайлас жемқорлыққа қарсы ойын еліміздегі сыбайлас жемқорлықтың нақты жағдайлары негізінде көркем шығарма форматында әзірленген, бұл ойыншыға аталған мәселенің салдарын тереңірек түсінуге көмектеседі. Әр эпизодтың соңында ойыншыға Қылмыстық кодекске түсініктеме беріледі. Ойынның соңғы миссиясы – сыбайлас жемқорлыққа қарсы іс-қимыл туралы заңнама саласындағы білімін осы бастан кеңейте түсу. Ойынның соңында көп ұпай жинаған ойыншы жеңімпаз атанады.
Компьютерлік ойынды мектепте орта және жоғары буын оқушыларына ойнатып, тәжірибе жасап көрген. Сондай-ақ Шығыс Қазақстан облыстық Сыбайлас жемқорлыққа қарсы іс-қимыл департаменті ұйымдастырған Өскемен қаласындағы «Үміт» балалар лагерінің тәрбиеленушілері де қызыға ойнапты.
Жетекшісінің айтуынша, Нұрали ойынды виртуалды шындықты пайдалануға бейімдеуді жоспарлап отыр. Бұл өзгерістер ойынға деген қызығушылықты одан әрі арттырады. Сонымен қатар ойынның қолжетімділігін арттыру және кең аудитория тарту үшін оны мемлекеттік тілге аударуды да қолға алмақ. Оның бұл мақсатына Аягөз ауданы Мыңбұлақ ауылында туып, Ақшәулі ауылынан түлеп ұшқан анасы Наталья Геннадиевна қуана қолдау көрсетері сөзсіз. Өйткені Жезкенттегі білім ошағында дәріс беріп жүрген ұстаз патриоттық тұрғыда қазақ тіліне әр кез құрметпен қарайтынын шынайы ризашылығымен жеткізді.
Абай облысы