Екібастұздағы жылу-электр орталығының қазіргі жағдайы қалыпты. Былтыр ала жаздай жүргізілген жөндеу жұмыстары нәтиже беріп, қазіргі күні қазандықтар мен өзге де агрегаттар іркіліссіз істеп тұр.
«Екібастұз жылу-энерго» ЖШС-да 2022 жылдың қараша айының соңында болған апаттан соң биыл қыста станса қаланы тағы тоңдырып алмай ма деген өткір мәселе туындағаны рас. Дейтұрғанмен өткен жылу маусымы тоқтаған сәттен бастап станса мен қала ішіндегі жылу жүйелерінде кең ауқымды жөндеу жұмыстары қолға алынды. Стансаның өзінде негізгі 10 жабдығы, атап айтқанда, 8 қазандық күрделі жөндеуден өтсе, тағы екеуіне ағымдағы жөндеу жүргізілді.
– Қазіргі уақытта қазандық агрегаттарынан шығатын жылу тасымалдағыштардың температурасы нормаға сай. Станса толық жүктемемен жұмыс істеп, қажетті параметрлерге шықты. Орталықтың қоймаларында 48 мың тонна көмір мен 300 тонна мазут бар. Бұл көлем нормативті қордағыдан жоғары, – дейді өңірлік энергетика және тұрғын үй-коммуналдық шаруашылық басқармасы басшысының міндетін атқарушы Күлбаршын Арынова.
Айтып өтейік, былтыр желтоқсан айында Арқаға келіп жеткен алғашқы аязда Екібастұздың жылу-энергия орталығы сыр берді. Кәсіпорындағы су жылыту агрегаттарындағы күлді шаюға арналған су құбырына зақым келіп, екінші цехтағы багер сорғысы су астында қалған. Салдарынан жылу параметрлері төмендеп, шаһар халқы үйлерінің салқындап кеткеніне шағымданған еді. Ол кемшіліктердің барлығы жойылған. Станса басшылығы алдағы аязды күндерге шыдас береміз деп отыр.
Былтыр Екібастұз бойынша жалпы ұзындығы 50 271 метр жылу құбырының оқшаулағыштары қалпына келтірілген. Бұл іс-шараны кәсіпорын қызметкерлері әлі де жалғастырып жатыр. Қаңтар айының басынан жалпы ұзындығы 413 метр құбыр арнайы материалдармен қапталған.
Павлодар облысы,
Екібастұз қаласы