Жуырда Петропавл қаласы өнерпаз өрендерінің «Қарлығаш» хореографиялық ансамблі Ресей астанасындағы балалар мен жасөспірімдердің «Московское время» атты халықаралық фестиваліне қатысып, бірінші орын алып келді.
Конкурсқа барлығы 1,5 мыңдай үміткер қатысты. Фестиваль Мәскеудің «Космос» қонақүйінің үлкен концерттік залында өтті. Қазылар қатарында Ю.Григорович атындағы конкурстың «Хореограф» аталымы бойынша екі дүркін лауреаты, Н.Сац атындағы балалар музыкалық театрының қоюшы-режиссері Е.Барышникова, халықаралық деңгейдегі топ-педагогтердің бірі Д.Акименко сияқты білікті мамандар болды.
Ресейдің барлық өңірлерінен келген өнерпаз ұландар арасында «Қарлығаш» ансамблі Қазақстаннан жалғыз барып, «халықтың стильдік биі» аталымы бойынша өнер көрсетті. Олар «Сұлу қыздар» және «Северные картинки» атты екі нөмір орындады.
Жеңімпаз жеткіншектерді поездан Петропавл қаласының әкімі С.Мұхамедиев бастаған ресми адамдар, ұстаздар мен туыстары қарсы алды. «Балаларымыздың жеңіске жеткеніне қуаныштымыз. Олар бүкіл Қазақстанның атын шығарып, табыспен оралып отыр. Біз олардың болашақта да үлкен биіктерден көрінуін тілейміз», деді әкім өзінің сөзінде.
Ансамбльдің көркемдік жетекшісі Галина Жұмалиеваның қуанышы ерекше деуге болады. Ол тебіреніп тұрып өзінің сезімін былай жеткізді: «Шынын айтқанда біз қатты толқыдық. Ресейдің түкпір-түкпірінен келген хореграфиялық ұжымдардың дайындығы өте күшті екен. Бәрі де жалындап тұрған жастар. Олардың арасында біздің ұжым барынша қарапайым болып көрінді. Бірақ сахнаға шыққанда шабыттанып кетті. Өзіміздің ұлттық колоритімізді жарқылдатып, қазақ өнерінің отын лаулатып жіберді. Оған көрермендер қатты риза болып, ұзақ уақыт қол соқты. Біздің биіміз фестивальдің жаңалығындай болды. Сондықтан да қазылар бірінші орын берді», деді ол.
«Қарлығаш» ансамблінің құрылғанына 50 жылдай уақыт болған. Ол бұған дейін де еліміздің және әлемнің сан түрлі сахналарында өнер көрсеткен. Балғын бишілердің қазіргі хореографы Виктория Тихонькова ұзақ жылдардан бері жұмыс істейді. «Біздің ансамбль негізінен халық билерін орындауға маманданған. Репертуарымызда қазақ, орыс және басқа да ұлттардың билері бар. Біз Мәскеуге бірінші рет бардық, ондағы мамандардың еңбегімізді жоғары бағалағанына қуаныштымын», деді ол.
Қарсы алушылар өнерпаздарға түрлі сыйлықтар, дипломдар мен кубоктар тапсырды. Мәскеу фестивалінде оларға Туапсе қаласында болатын фестивальға шақыру берілген. Сонымен бірге ансамбль осы жазда Санкт-Петербургте болатын фестивальға қатысудан үмітті.
ПЕТРОПАВЛ