Халықаралық футбол тарихы мен статистикасы федерациясы (IFFHS) 2023 жылдың қорытындысы бойынша әлемнің ең үздік клубтарының тізімін жариялады.
Үздіктер көшін «Манчестер Сити» бастап тұр. Былтыр бұл команда Англия Премьер-лигасын ұтып, ел кубогін иеленді. УЕФА Чемпиондар лигасында қарсылас шақ келтірмей, УЕФА суперкубогін олжалады. Одан бөлек, клубтық әлем чемпионатында алдына жан салмады. Мадридтің «Реалы» екінші орын алса, Миланның «Интері» үшінші сатыға табан тіреді. Сондай-ақ «Аль-Ахли» (Мысыр), ПСВ (Нидерланд), «Байер» (Германия), «Флуминенсе» (Бразилия), «Фиорентина» (Италия), «Палмейрас» (Бразилия) және «Порту» (Португалия) сынды әйгілі клубтар ТОП-10 команданың қатарынан көрінді.
Қазақстанның клубтары арасында ең жақсы нәтиже «Астанаға» тиесілі. Елордалық футболшылар 414-орынды еншіледі. Салыстырмалы түрде алсақ, «Астана» Санкт-Петербургтің «Зенит», Мәскеудің «Локомотив» және тағы басқа бірқатар белді командалардан жоғары тұр.