«Майқайыңалтын» АҚ-ға қарасты кен байыту фабрикасы 1 сәуірге дейін жұмысын тоқтатады. Фабриканың уақытша кідіруіне қалдық қоймадағы шикізаттың таусылуы себеп болған. Ал алтын кенішіндегі жұмыс апат күнінен бері қаңтарылып тұр.
Бүгінде «Майқайыңалтын» АҚ-да штаттағы қызметкерлер саны 933 адамды құрап отыр. Оның ішінде 143 адам – жыл сайынғы еңбек демалысында, 30 қызметкер – бала күтіміне, 42 қызметкер – уақытша еңбекке жарамсыздығына байланысты демалыста. Тағы 5 ер азамат Қарулы күштер қатарында әскери борышын өтеп жүр.
Кеніштегі апат пен оның маңындағы үйлердің мәселесін прокуратура құрған тергеу тобы зерделеп жатқанына байланысты шахтадағы кен қазу жұмыстары 4 қаңтардан бері қаңтарулы. Қазір жалақысының 50 пайызы төлене отырып 153 қызметкердің жұмысы тоқтап тұр. Олар – шахтаның 109 қызметкері және тау-кен техникасы учаскесінде жұмыс істейтін 44 адам.
Енді осы аптаның ортасынан, яғни 22-23 ақпаннан бастап алтын кенішіне қарасты кен байыту фабрикасының да жұмысы уақытша тоқтайды. Бұл туралы Павлодар облысы Еңбек басқармасы басшысының міндетін атқарушы Абылай Сабыров хабарлады.
– «Майқайыңалтын» АҚ жұмыс берушісінің ауызша түсіндірмесіне сәйкес қазіргі уақытта кәсіпорын фабрика жұмысын тоқтатуға дайындық жүргізіп жатыр. Шамамен биыл 22-23 ақпанынан бастап тоқтатылады деп жоспарланып отыр. Бұл ретте кәсіпорын қызметкерлеріне жалақысының 50 пайызы төленетін болады. Жұмысы уақытша тоқтатылатын қызметкерлердің саны туралы ақпаратты кәсіпорын пысықтау үстінде. Нақты санын «Майқайыңалтын» АҚ басшылығы осы аптаның соңына дейін хабарлауы керек. Жұмыс берушінің ақпараты бойынша қызметкерлерді толық жұмыстан босату мәселесі қарастырылмаған. Фабрика биыл 1 сәуірден бастап қайтадан іске қосылады, – дейді Абылай Ақанұлы.
Белгілі болғандай, фабрика 4 қаңтарда шахта жұмысын тоқтатқанына байланысты осы уақытқа дейін қалдық қоймадағы шикізатты пайдаланып келген. Кеніштегі апаттың себеп-салдары толық зерделеніп біткенше шахта жабық болады. Соған сәйкес фабрика да өз жұмысын жалғастыра алмай отыр.
Бұған дейін Майқайың кенішінің «Шанхай» ауданында тұратын халық әр күнін үреймен өткізіп келе жатқаны туралы жазған едік. Алтын кеніші бұл жерден 300-400 метрдей жерде орналасқан. Кеніште жер жару жұмыстары жүргізілгенде, үйіміз жер астына опырылып түсіп кетіп, бала-шағамызбен опат боламыз ба деген қорқыныш бар жұрттың бойында. Парламент Мәжілісіндегі «Amanat», «Ауыл», «Ақ жол» және «Respublica» партияларының Майқайың кентіндегі мәселе бойынша жолдаған депутаттық сауалдарына Бас прокурор Берік Асылов жауап берді. Бұл туралы Мәжіліс депутаты Жарқынбек Амантай хабарлады.
Бас прокурордың мәлімдеуінше, прокуратура органдарының үйлестіруімен ведомствоаралық жедел-тергеу тобы (Полиция департаменті, Сыбайлас жемқорлыққа қарсы қызмет, Экономикалық тергеп-тексеру департаменті) құрылып, 4 процестік прокурор тағайындалды.
«Тергеп-тексеру барысында «Қарағандыгипрошахт» ЖШС-мен тау-кен-құрылыс жұмыстары саласындағы маман тартылды (кеніштің құлау себептері туралы қорытынды беру жəне шахтада жұмыс жүргізу кезіндегі заң бұзушылықтарды анықтау үшін). Сондай-ақ уəкілетті мемлекеттік органдардың (Мемлекеттік кірістер департаменті, Өнеркəсіптік қауіпсіздік департаменті, «Центрказнедра» РММ, Экология департаменті, Санитарлық-эпидемиологиялық бақылау департаменті) мамандары жұмылдырылды. Қылмыстық іс бойынша бірқатар тергеу əрекеттері (тінту, алу, сараптама, жауап алу жəне т.б.) жүргізіліп жатыр, олардың қорытындысы бойынша кəсіпорынның жауапты тұлғаларының, сондай-ақ уəкілетті мемлекеттік органдардың лауазымды адамдарының əрекеттері мен əрекетсіздігіне құқықтық баға берілетін болады. Тергеу жалғасып жатыр», деп жазылған жауапта.
Сонымен қатар осы оқиға бойынша Еңбек жəне халықты əлеуметтік қорғау министрлігінің Еңбек жəне əлеуметтік қорғау комитеті құрған комиссия жұмыс жүргізіп жатқаны айтылған. Оның құрамына «Авариялық-құтқару қызметтері қызметкерлерінің жергілікті кəсіптік одағы» ҚБ өкілі енген. Қорытындысы іс материалдарына қоса тіркелді.
Өз кезегінде, Павлодар облысы əкімдігі жанындағы өңірлік жедел штаб (құрамына облыстың құқық қорғау, арнаулы жəне өзге де мемлекеттік органдары кіреді) Майқайың кентінің тұрғындарына кəсіпорын өндірісінің əсерінен туындауы мүмкін тəуекелдерді зерделеп жатыр. Кəсіпорынның өнеркəсіптік алаңы 10 мыңға жуық тұрғыны бар Майқайың кентінің жанында орналасқаны анықталды. Санитарлық-қорғау аймағының шекарасы 500 метр, ауданы 17 гектардан астам, Павлодар облысы əкімдігінің 12.02.2013 жылғы №39/2 қаулысымен айқындалған. Аймаққа 206 жер учаскесі кіреді, оның ішінде 311 адам тұратын баспана ғимараттары орналасқан 103 учаске бар.
«Прокуратура органдары аталған учаскелер бойынша жергілікті атқарушы органның əрбір актісінің заңдылығын зерделеп жатыр. Анықтама ретінде барлық архивтік материалдар, оның ішінде жер-кадастрлық істер талап етілді, өйткені көптеген құрылымдар жылжымайтын мүлікті заңдастыру бойынша заңдастырылған, яғни құқықтары санитариялық-қорғау аймағы белгіленгенге дейін айқындалған», деп жазылған жауапта.
Қылмыстық істі тергеп-тексеру барысы жəне тексеру шаралары бақылауда. Қазір Майқайың кеніші аумағындағы іздестіру жұмыстары жалғасып жатыр. Әзірше ойық түбіне техника өздігінен жүріп баратындай қауіпсіз жол салынып жатыр. Бұл іске «Майқайыңалтын» АҚ жауаптанды.
Павлодар облысы,
Баянауыл ауданы,
Майқайың кенті