Талғар ауданы Кеңдала ауылдық округінде орналасқан «Алматы» асыл тұқымды ауылшаруашылық кооперативі 2016 жылдан бері сүт өндіру бағытында жұмыс істеп келеді.
Бұған дейін 1 500 бас сиыры бар шаруашылыққа өткен жылдың қыркүйек айында Эстония мен Нидерландтан асыл тұқымды 1 300 бас голштейн құнажыны жеткізілген. Жауаптылардың айтуынша, әрбірінің құны 1 миллион 358 мың теңге. Ал мұндай қомақты қаржыны шаруашылық «Қонаев» әлеуметтік кәсіпкерлік корпорациясы (ӘКК) арқылы төмен пайызбен алып, игілігін көріп отыр. Аталған шаруашылықта 210 адам тұрақты еңбек етеді.
Мемлекеттік қолдауға ие болған шаруашылық асыл тұқымды ірі қара санын көбейту арқылы өңірдің сүт өндіру әлеуетін арттыра түспек. Мұнда шаруалар пайызы төмен несие алумен қатар 40 пайыздық субсидияға қол жеткізеді.
«Асыл тұқымды мал басын көбейтіп, кәсіпкерлікті кеңейту мақсатында 1,8 млрд теңгеге инвестиция тартып, 3,5 пайызбен «Қонаев» ӘКК арқылы лизингке осы 1 300 басты алдық. Ұрықтанып келген құнажындардың жартысына жуығы бұзаулады. Сүтті сиырлардан күніне орташа есеппен 24-25 литр шамасында сүт сауылады. Осы уақытта сүт өңдейтін «Фуд-Мастер» кәсіпорнына тәулігіне 18-20 тонна сүт жөнелтіп отырмыз. Болашақта бұл көрсеткішті тәулігіне 100 тоннаға дейін жеткізсек деген ойымыз бар. Шаруашылық қарамағында Талғар ауданында 800 гектар суармалы, сондай-ақ Шеңгелді массивінде мың гектарға жуық жеріміз бар. Осы жерлерді игеру арқылы мал азығының берік қорын жасап, жемшөппен жеткілікті мөлшерде қамтамасыз етіп келеміз», дейді «Алматы» асыл тұқымды ауыл шаруашылығы кооперативінің атқарушы директоры Рүстем Ахметжанов.
Талапқа сай жабдықталған қоражайда құнарлы азықпен қамтылған сауын сиырлардың жас төлдеріне де айрықша күтім жасалып жатыр.
Уызға жарыған малдың күйі жақсы болары бесенеден белгілі. Сол себепті жаңа туған бұзауларға алғашқы онкүндікте сиырдың өз уызы беріледі екен. Одан кейін үш уақыт 2 литрден жылытылған сүт беріп, ерекше күтім жасалатынын аталған шаруашылықтың маманы Дидар Байсуанов тілге тиек етті.
Бүгінде Талғар ауданы бойынша «Амиран», «Байсерке Агро», «Алматы» асыл тұқымды ауылшаруашылық кооперативі сынды үш ірі шаруашылықта 7 мың бас асыл тұқымды сауын сиыр бар.
«Аталған шаруашылыққа алдағы уақытта жарты млрд теңгеге дейін субсидия беру көзделіп отыр. Қазір құжаттары әзірленіп жатыр. Мемлекеттік қолдаудың нәтижесінде шаруашылықтардың өнім көлемі артып, іргесі кеңейіп келеді. Бұл өз кезегінде табиғи сүт өнімдерін өңдеу кәсіпорындарының қуаттылығын арттыруға септігін тигізері сөзсіз», дейді Талғар ауданының әкімі Танат Айдарбеков.
Аудан әкімінің сөзінше, Талғар ауданы Нұра ауылында мың басқа арналған тағы бір тауарлы-сүт фермасын ашу жоспарланып, құрылыс жұмыстары басталған.
Бұған қоса «Алел-Агро» құс фермасына 285 мың балапан әкелінген. Сонымен қатар су үнемдеу мақсатында 3 500 гектар жерді тамшылатып суару әдісіне көшіру көзделген. Бұған дейін оның көлемі мың гектар шамасында ғана екендігін айтқан аудан әкімі ауыл шаруашылығы саласын жандандыру жұмыстары жалғаса беретіндігін жеткізді.
Алматы облысы