Су тасқынынан зардап шеккен өңірдің бірі – Құлсары қаласы. Жылыой ауданының орталығына Жем өзенінің арнасынан асқан судың кіргеніне бір айдан асты. Тасқын зардабын жою әлі жалғасып жатыр.
Атырау облысының жедел штабының мәліметінше, Құлсарыдан Атырау, Ақтау қалалары мен «Теңіз» кенішіндегі эвакуация пункттеріне 36 738 тұрғын көшірілді. Тұрғындардың дені оралғанымен, әлі де 809 адам эвакуациялық пункттерде тұрып жатыр. Оның ішінде 371 адам «Теңіз» вахталық қалашығындағы эвакуациялық пунктте орналасқан. Көршілес Ақтау қаласындағы эвакуациялық пункттерге орналасқан 86 тұрғын тұрғылықты мекеніне әлі оралмаған. Ал Құлсары қаласында ашылған эвакуация пункттерінде 352 адам тұрып жатыр.
Құлсарыдағы тасқынға байланысты күрделі жайт ел азаматтарының бәрін алаңдатып отыр. Әр өңірден көмек қолын созып жатқандар бар. Кеше Атырауға Алматы қаласы мен Алматы облысынан жіберілген гуманитарлық көмек жеткізілді. Гуманитарлық көмек Президент жанындағы Әйелдер істері және отбасылық-демографиялық саясат жөнiндегi ұлттық комиссияның бастамасымен жиналған.
Нақтылай айтқанда, қаражат пен қажетті заттардың жиналуына Алматы қаласы және Алматы облысы әкімдерінің жанындағы Әйелдер істері және отбасылық-демографиялық саясат жөніндегі комиссиялардың мүшелері бастамашы болған. Оған қалалық және облыстық Жастар саясаты басқармаларының қызметкерлері атсалысқан.
«Ел азаматтары Атырау облысындағы жағдайды жанашырлықпен бақылап отыр. Халықаралық Отбасы күніне орай жіберілген гуманитарлық көмекте бірінші кезекте қолданылатын төсек-орын жабдықтары, азық-түлік, медициналық препараттар мен жаңа киімдер бар», деді Атырау облысы әкімінің жанындағы Әйелдер істері және отбасылық-демографиялық саясат жөніндегі комиссияның бас инспекторы Зәмзагүл Жалмурзина.
Оның айтуынша, өңірлік комиссия мүшелері мен әскерилер гуманитарлық көмекті сұрыптайды. Мәселен, матрац, төсек-орын жиынтығы, көпшік, жамылғы көрпе, сүлгі, гигиеналық заттар, азық-түлік, жаңа киім, шаруашылық және құрылысқа қажетті бұйымдар Құлсары қаласына жеткізіледі.
Атырау облысы