Кеше Қазақстан Республикасы Парламенті Мәжілісінің Төрағасы Орал Мұхамеджанов Беларусь Республикасының Отанымыздағы Төтенше және өкілетті елшісі Валерий Брылевті оның өтініші бойынша қабылдады, деп хабарлады осы палатаның баспасөз қызметі.
Кездесуде Мәжіліс Төрағасы елшінің Қазақстандағы дипломатиялық қызметінің басталуымен құттықтай келіп, халқымыз “Елдестірмек – елшіден” дегендей, қос мемлекеттің арасындағы ынтымақтастықты нығайтуда елшінің атқаратын рөлі зор екенін айтып өтті.
Тараптар бүгінгі таңда елдер арасында ықпалдастық байланысқа баса мән беріліп отырғаны жөнінде, екі жақты қарым-қатынасты арттырудың жолдары және Кеден одағының келешегі туралы пікір алмасты.
Кездесуде парламентаралық ынтымақтастық мәселелері де сөз болды. Осы орайда елші Мәжіліс Төрағасына Беларусь Республикасының Ұлттық жиналысы Өкілдер палатасының төрағасы Владимир Андрейченконың қазақстандық әріптесін өзіне қолайлы уақытта ресми сапармен еліне келуге шақырған хатты табыс етті.