Таяуда Щучинск қаласында ақын, қоғам қайраткері Марфуға Бектемірованың атына көше берілді. Салтанатты рәсімге есімдері елге белгілі қаламгерлер мен жырын жаттаған оқырманы қатысты.
Ақын – жалаулы жасыл дүниеде аз ғана ғұмыр кешсе де, артындағы қара ормандай қалың еліне мол мұра қалдырған қаламгер. Марфуғаның бай мұрасын шашау шығармай жинақтап, сөз өнерін сыйлап өскен елге таныстырып, табыстырып жүрген жары Есенгелді Сүйінов.
Туған жерінде құрметтеліп, көше атауының берілуі ақынға ғана емес, өлең сөздің өкіліне деген шынайы құрмет десек, артықтығы болмас.
Салтанатты рәсімде қала әкімі Асхат Мұхамеджанов, облыстық мәдениет басқармасының басшысы Айгүл Сәбитова, «Amanat» партиясы Ақмола облыстық филиалының қызметкері Ақманат Әлімбетова, Қазақстанның еңбек сіңірген қайраткері Ораз Қауғабай, жазушы Асылбек Байтанұлы, ақын Құдайберлі Мырзабек тәрізді азаматтар қатысып, Марфуға Бектемірованың шығармашылығы туралы айтып берді. Марфуғаның осы Щучинск қаласындағы мектеп-интернатта оқып, білім алғандығын айта кетуіміз керек.
Кеш барысында ақынның жүрек тебірентер өршіл өлеңдері оқылды. «Жан дүниемнің жаңғырығы» тақырыбындағы кітап көрмесі ұйымдастырылды. Осылайша, ойлы жанның көкірегіне көп-көрім сезім сәулесін себезгілететін шырайлы іс-шара ұйымдастырылып, туған елі ақын тұғырын биігіне көтерді.
Ақмола облысы,
Бурабай ауданы