Көркем гимнастикадан Астанада өткен ел чемпионатында Елжана Таниеваға тең келер ешкім табылмады. Көпсайыстың қорытындысы бойынша ол алдына жан салған жоқ.
Еліміздің ең үздік гимнасшысы, бірқатар халықаралық жарыстың жеңімпазы және жүлдегері, Азияның абсолютті чемпионы деген атағы бар 18 жастағы шымкенттік спортшы елордада жалауы желбіреген жарыстың қорытындысы бойынша 133.150 ұпай жиды. Бұл нәтиже Елжана Таниеваға кезекті рет Қазақстан чемпионы атану үшін жеткілікті болды. Күміс медальды астаналық Милана Парфилова (131.850 ұпай) иеленсе, қола жүлдені тағы бір елордалық Айбота Ертайқызы (127.900 ұпай) еншіледі. Тағы бір танымал гимнасшы Эрика Жайлауова (127.800) төртінші орында қалып қойды.
– Жуырда ғана Ташкентте өткен Азия чемпионаты физикалық тұрғыдан ғана емес, психология жағынан да өте ауыр болды. Себебі кез келген бапкер өз шәкіртінің Олимпия ойындарына қатысқанын қалайды. Бұл жолы лицензияны жеңіп алудың өзі оңай болған жоқ. Азия чемпионаты мен Қазақстан чемпионатының арасы жақын болғанымен, бұл жарыстан бас тарта алмаймыз. Өйткені бұл – еліміздегі ең басты дода. Қиын болса да, Елжана соңына дейін күресіп, бас жүлдені олжалады. Жеңіс тұғырына көтерілген өзге арулардың да өнеріне ризамын, – дейді ұлттық команданың бас бапкері Әлия Юсупова.
Командалық сайыста Шымкент шаһарының спортшылары (60.550 ұпай) бірінші орынды иеленсе, Астана қаласы (54.600 ұпай), Шығыс Қазақстан облысының (46.550 ұпай) өкілдері екінші және үшінші сатыларға жайғасты.