Ұлттық тәрбиенің өзегі

Өңірдегі білім ны­­сан­дарындағы ты­ныс-тіршілікті без­­­бен­­дейтін баспасөз туры ая­сын­да ұлттық дәстүрге негіз­дел­ген қыруар жұмыстың қалай қарқынды жүргізіліп жат­қандығын көріп, түйсінудің мүм­кіндігі туды. Щучинск қала­сын­дағы №7 қазақ мектеп-лицейі тәп-тәуір екен. Мектеп іші бала­лардың санасына салмақты ой сіңіретін құндылықтармен безен­дірілген. 2021 жылдан бас­тап оқу орны «Білім-инно­ва­ция» лицейлерімен меморандум жасап, әр ай сайын тәрбие жұмыстарын жетілдіру мақ­сатында жанға жағымды жаңа­лықтарын еселей түседі. Мысалы, қыркүйек айында жауап­­кершілік айлығы өтіпті. Осы айлықтың аясында тақырып кеңінен ашылып, оқушылардың ой-танымына оралымды тәрбие шуағы себезгілеген. Ал «Оқу мектебі» жобасы жас ұрпақты көркем әдебиетпен дос­тастыру бағытында талпыныс жасап жатыр. Мектеп оқушылары ұлттық әдебиеттің мәйегімен сусындап, жан дүниелерін әдемі де мазмұнды әлемнің шырайлы шұғыласымен көркейте түседі. Білім ошағындағы кәдімгі киіз үй бейнесіндегі ұлттық музей де көзтартарлық жәдігерлерге тұнып тұр. Жай ғана жәдігер емес, есте жоқ ескі кезеңнің талай сәтінің куәгері іспетті. Наурыз айында «Құрмет айлығы» ұйым­дас­тырылыпты. Бір ай бойы оқу­­шылар ұлттық салт-дәстүр мен әдет-ғұрыптарды саралай сал­мақтап, бай мазмұнын бағам­дап, таным көкжиегін кеңейт­кен. Хал­қы­мызбен бірге жасасып келе жат­қан мол қазына жас тол­қын­ның ой түзеуіне, бой түзеуіне сеп­­ті­гін тигізіп жатса, ғанибет емес пе?

Мектепте аналар мен әке­лер клубтары да белсенді жұмыс істейді. Әсіресе екінші клуб жұмысы айтарлықтай қызы­ғушылық туғызып отыр. Бұрын жұмысбасты әкелер перзенттерінің оқу үлгерімін аналарына тапсырып қойса, енді осы іс басталғалы көңіл бөле бастаған. Айтпақшы, Бурабай ауданында әкелер клубы екі оқу орнында ғана бар екен. Соның ішінде №7 мектептегі «Асқар тау» әкелер клубының жұмысын айта кетуге болады. 860 оқушы оқитын №7 мектепте сыныптан тыс жұмыстар жүйелі жолға қойылған. Мұнда қырыққа жуық үйірме, бірлестік жұмыс істейді. Осының барлығы мектеп оқушыларының қызы­ғушылығын туғызып, білімді еселей түсуге ықпал етеді.

Ауылдағы мектептің ахуа­лы туралы кейде өкпе де айтылатыны белгілі. Ауыл мен қала мектептерінің арасындағы айырмашылықты жою өзекті екендігі баршаға белгілі. Бура­бай баурайындағы білім ошақ­тарында жақсы жаб­дық­талған оқу кабинеттері, замауи зертханалар, арт-сту­дия, телестудия, еңбек сабақ­тарына арналған шеберханалар бар екен. Осындай мақтаулы мектептің бірі – Бұланды ауданына қарасты Макинск қаласындағы Балуан Шолақ атындағы қазақ мектеп лицейі. Білім ошағы 350 орындық болғанымен қазір мұнда екі ауысыммен 597 оқушы білім алады. Өткен оқу жылында «Қазақстан халқына» қоры бөлген 250 миллион теңге қара­жатқа жөндеу жұмыстары жүр­гізілген. STEM-зертхана, теле­студия, артстудия, кітапхана, сахна киімдері, жарық, дыбыс жаб­дықтарымен қамтылып, мерейлері өсіп қалыпты.

«Осындай жұмыс оң нәти­жесін бере бастады, – дейді мек­теп-лицейдің директоры Азамат Қуанышев. – Расул Заңдыбай мен Рауан Шайзан есімді екі оқушымыз роботтехникадан республикалық байқауда үшінші орынға ие болды. Түркияда өткен халықаралық байқауда үздік нәтиже көрсетіп, Италияда ұйымдастырылатын халықаралық чемпионатқа жолдама алды».

Көркем еңбек сабағында оқушы қыздар тігін машиналарында іс тігіп үйренеді. Пән мұғалімі Ләззат Уақапованың ай­туынша, оқушылардың талабы тәп-тәуір. Ұлдарды токарь­лық­ мамандыққа баулиды. Қа­зір­­­дің өзінде шағын станоктарда жұмыс істей алады.

Сонау 1955 жылы іргетасы қаланған Макинск лицейі алда­ғы жылы 70 жылдығын той­ламақ. Ежелгі мектептің тозуы да түсінікті. Күрделі жөн­деуді қажет етіп тұр. Әйтсе де, ішкі мазмұн, берік білім дәс­түрі қалыпты деңгейде. Ақкөл қаласындағы Жайық Бек­тұров атындағы №3 жалпы білім беретін қазақ мектебі – осы төңіректегі ауылдық мек­тептер үшін тірек мектеп. Өткен оқу жылында «Қазақстан халқына» қоры бөлген 250 миллион теңгеге материалдық-тех­никалық базасын жақсартып алыпты. №3 жалпы білім беретін мектепте әкелер мен аналар клубы нәтижелі жұмыс істейді. Ұрпақ тағдырына алаң­даған ата-аналар «Киелі шаңырақ» деп аталатын аналар мектебіне жиі соғып, өз ойларымен бөліседі. Бар ынта бала тәрибесіне арналған. Жас құрақтай жайқалып өсіп келе жатқан оқушы қыздарға өздері білетін өмірлік мәні зор кәсіпті үйре­туден жалығатын емес. Көңіл­дері қалап атқаратын шаруа – тігін тігу. Бұрынғыдай емес, 12 жаңа электр тігін машинасында жұмыс істеу – жан рақаты. Ақкөл мектептерінде білім алатын 12 ауылдың балалары интернатта оқып жүр. Оқу­шы балаларға барлық жағдай жасал­­­ған. Алдағы оқу жылында оқушылар саны көбейе түсуі әбден мүмкін. Ауыл бала­ла­ры­ аудан орталығындағы бар мүм­кін­дікті пайдаланып жатыр.

Білмекке құштар балалар қамқорлық құшағына да, мем­лекеттің жан жадыратар жана­шыр мерейінің арқасында бақытқа бөленіп, өсіп келеді. Ел ертеңінің қамы бүгін жан-жақты ойластырылып, бар бала балапандай бапталып жатса, тамаша емес пе?

Ақмола облысы