Атырау облысында «Таза Қазақстан» акциясы енді басталды. Өйткені өңір тұрғындары кейінгі екі ай бойы Жайық өзеніндегі тасқын судан төнген қауіпке байланысты әбігерге түскен еді.
Облыстық экология департаментінің ұйымдастыруымен аталған акция алғаш рет өтті. Бас мемлекеттік экологиялық инспектор Ерлан Есеновтің айтуынша, аталған акция екі айға кейін басталуына табиғи сипаттағы төтенше жағдай себеп болған.
«Акцияның негізгі мақсаты – қоршаған ортаны қоқыстан тазартып, табиғатты таза ұстауға шақыру. Жас ұрпақты осындай қоғамдық іс-шараға белсене атсалысуға баулу», дейді Ерлан Есенов.
Мұнайлы өңірде бастау алған экологиялық акцияға алғашқы күні 2130 адам қатысты. Оның 200-ден астамы Атыраудан Оралға қатынайтын күре жолдың оң жақ бөлігін тазалауға жұмылды. Бір күнде Атырау қаласының аумағынан 110 тонна қоқыс жиналып, «Арнайыавтобаза» ЖШС-нің арнайы полигонына тасымалданды.
Бұрнағы күні Жайық өзенінің Атырау қаласындағы жағалауынан топырақ толтырылған қапшықтарды жинау басталды. Өйткені қалалық әкімдіктің баспасөз хатшысы Ғасырбек Төлегеннің айтуынша, су айдынының қауіп сейілген аумағынан құм толтырылған қапшықтарды жинап алуға ұйғарым жасалған.
«Кейінгі күндері Атырау қаласында Жайық өзеніндегі су деңгейі төмендеп келеді. Бірнеше күннен бері судың деңгейі көтерілген жоқ. Сол себептен, қалалық әкімдіктің шешімімен тасқын су басу қаупі сейілген аумақтардан топырақ салынған қапшықтарды жинау қолға алынды. Алдымен «Авангард» шағын ауданындағы және орталық көпір тұсындағы жағалаудан құм толтырылған қапшықтар жиналып жатыр», деді Ғ.Төлеген.
Жайық өзенінің Атырау қаласы аумағындағы жағалауында 250,7 шақырым бөгет бекітілген. Қалалық әкімдік тарапынан осы мақсатқа 4 млн 900 мың қапшық таратылыпты.
«Жайық өзенінің жағалауын бекіту үшін қапшыққа толтырылған топырақ арнайы карьерлерден алынған еді. Енді өзен жағалауынан жиналған қапшықтағы топырақ сол карьерлерге қайта төгіледі. Бұл жұмысты Жайық өзенінің жағалауын бекіту тапсырылған компаниялар мен мекемелер атқарады», деп мәлім етті Ғ.Төлеген.
Ал Жылыой ауданының орталығы – Құлсары қаласында екі ай бұрынғы тасқын судың зардабын жою жалғасып жатыр. «ЖылыойТазалық» ЖШС-нің директоры Бауыржан Абдрахмановтың айтуынша, қаланың су басқан көшелеріне «West Dala» ЖШС-дан әкелінген 20 контейнер қойылған. Әр контейнердің сыйымдылығы – 8 мың текше метр. Қоқыс жиналатын контейнерлерін тасымалдайтын 2 арнайы көлік бөлінген.
«Біздің кәсіпорынның қызметкерлері Құлсары қаласының су басқан көшелерінен күн сайын тұрмыстық қалдықтарды шығаруды жалғастырып келеді. Бұл жұмысқа кәсіпорыннан 50 жұмысшы, 20 арнайы техника тартылды. Қазір арнайы комиссияның шешімімен апатты деп танылған үйлерді бұзу, кейбір баспананы жөндеу, қалпына келтіру жұмысы қолға алынып отыр. Сол себептен, тұрмыстық қалдықтарды шығаруды жалғастыра береміз», деді Б.Абдрахманов.
Оның айтуына қарағанда, «Атырау», «Жадырасын», «Автодорожник-2 шағын аудандары қоқыстан толық тазартылған. Кейінгі күндері 2-ауыл, 4-ауыл, «Автодорожник-1», «Достық» шағын аудандарынан да тұрмыстық бұйымдар қалдығы шығарылған. Осы кезге дейін Құлсары қаласының көшелерінен арнайы полигонға 25 мың тоннадан астам тұрмыстық қалдық пен түрлі арнайы полигонға тасымалданған.
Атырау облысы