Алматы облысында футболға ерекше көңіл бөлініп жатыр. Атап айтсақ, бір жарым жыл бұрын Қонаев қаласында футболдан облыстық мамандандырылған балалар мен жасөспірімдер спорт мектебі ашылып, бүгінде әр ауданда филиалдары тұрақты жұмыс істейді.
Сонымен қатар «Іле-Алатау» кәсіби клубы да құрылған. Ондағы спортшылар Қазақстанның 2-лига ойынында Алматы облысының абыройын республикалық деңгейде қорғайтын болады. Жасыл алаң иелерінің бәсекелі жарыстары жалғасын тауып келеді.
Жуырда Іле ауданының орталығы Өтеген батыр ауылындағы жасөспірімдер спорт мектебінің стадионында алғаш рет «Алматы облысы әкімінің кубогі» үшін футболдан облыстық турнир ұйымдастырылды. Оған облыс аудандары мен Қонаев қаласынан іріктелген командалар қатысып, тартысты ойын өрнегін көрсетті.
«Облыста бұқаралық спортты дамытуға мемлекеттік қолдау көрсетудің нәтижесінде заманауи спорт нысандары салынып, материалдық-техникалық база жаңартылуда. Барлық аудандарда дене шынықтыру-сауықтыру кешендері жұмыс істейді. Халықаралық жарыстарда топ жарған спортшыларымыздың жетістіктері жетіп-артылады. Биыл Парижде өтетін Олимпия ойындарына Алматы облысы спортшыларының 5 лицензия жеңіп алуы – біз үшін үлкен жетістік. Осы жарыста дайындықтарыңыздың жоғары деңгейі мен спорттық шеберліктеріңізді көрсете алатындарыңызға сенімдімін», – деген өңір басшысы Марат Сұлтанғазиев футбол командаларына сәттілік тіледі.
Сайысқа облыстың барлық аудандары мен Қонаев қаласынан 10 команда қатысты. Тартысты турнирдің қорытындысы бойынша үздік ойын көрсеткен Қонаев қаласының командасы 1-орынды иеленіп, жеңімпаз атанды. Ал Кеген ауылының жастары 2-орынды иеленсе, Іле ауданының футбол командасы 3-орынға тұрақтады.
Футбол маусымын ашқан бұл турнир алдағы уақытта өңірдің барлық аудандарында өтетін ала доп бәйгесінің бастауы болғаны анық.
Алматы облысы