«Таза Қазақстан» экологиялық акциясы Батыс Қазақстан облысында белсенді өтіп жатыр. Жақында төрт аудан мен Орал қаласында «Игі істер» марафоны ұйымдастырылды.
– «Таза Қазақстан» акциясының негізгі мақсаты – қоршаған ортаны қорғау мәселесіне қоғам назарын аудару және жастарды экологиялық бастамаларға тарту. Біз замандастарымызды қоршаған ортаның жағдайын жақсартуға және табиғатқа жауапкершілікпен қарауға тәрбиелеуге тырысамыз. Орал қаласында саябақтар мен Жайық өзені жағалауын тазаладық, көшет ектік. Ақпараттық тақталар орнатып, тұрмыстық қалдықты сұрыптау бойынша шеберлік сабағын өткіздік. Осы іс-шараларымызға 200-ден аса студент, мектеп оқушылары және қала тұрғындары қатысты. Болашақта да осындай акцияларды тұрақты өткізіп, іс-шаралар ауқымын кеңейтеміз деп ойлаймыз. Осынау игі іске көбірек адам тартылса керемет қой. Халықтың экологиялық сауатын арттыру үшін кейбір білім бағдарламаларын да қолдануды жоспарлап отырмыз, – дейді «Ғасыр» жастар қоғамдық бірлестігінің төрағасы Болатбек Сахиев.
Осындай игі іс-шаралар Тасқала ауданында да өтті. Жастармен жұмыс жөніндегі аудандық ресурстық орталық басшысы Жиенбай Наурызбайұлы таяуда жастар аудан орталығында тұратын үш ардагердің үйіне барып, ауласын, үйін тазалап, шөбін орып, қоқысын шығарып, ағаштарын әктеп қайтқанын айтты. Бұл акция аясындағы «Өнегелі ұрпақ» апталығына орай ұйымдастырылған іс-шара екен.
– Біз әуелі ауыл әкімдігінен көмек қажет ететін жалғызілікті қариялар туралы ақпарат сұрадық. Сөйтіп, Сара Боранбаева, Қымбат Сердалиева және Тойғаным Мақаева есімді әжелеріміздің үйіне бардық. Қариялардың қуанышында шек жоқ, күтімсіз қалған ауланы арамшөп басып, аспанмен таласып тұр екен. Жастар ойнап-күліп, жарысып жүріп тазалап тастады. Қайырымды іске қол созған жастарға да түрлі сый-сияпат берілді. Бірақ сыйлықтың үлкені ақ жаулықты әжелердің жүрекжарды алғысы болды, – дейді Жиенбай Наурызбайұлы.
Айтпақшы, Тойғаным әжейдің үйінің шатырын жақында жел ұшырып, бүлдіріп кеткен екен. Аудандық ресурстық орталық басшысының айтуынша, жақында ол үйге арнайы мамандар барып, қарияның үйінің шатырын жөндеп бермек.
Бір тәуірі, республикалық «Таза Қазақстан» жалпыұлттық экологиялық акциясы түрлі бағытқа бөлінген. Мысалы, «Таза өлке» бағыты бойынша белсенді жастар Тасқала ауданының ең әдемі мүйісі – Ешкітауға шығып, тау баурайын түрлі қоқыстан тазартты. Бейберекет өскен шөпті орып, реттеп, ағаш түптерін әктеп, табиғи бұлақтың көзін ашты. Дәл осындай тағылымды іс-шара Бөрлі ауданында да өткен екен.
– Біз табиғатқа жауапкершілікпен қарау мәдениетін қалыптастырып, тұрғындарды белсенді экологиялық әрекетке тартып отырмыз. Бөрлі ауданының Ақсай қаласында қоғамдық орындарды жинап, ағаш егіп, қоқысты сұрыптап жинауға арналған урналар орнаттық. Экологияны сақтау туралы семинарлар ұйымдастырдық. Осынау іс-шараларға 200-ге жуық адам, оның ішінде еріктілер, мектеп оқушылары, студенттер мен қала тұрғындары қатысты, – дейді Бөрлі ауданындағы жастар ұйымының төрағасы Ербол Балгерейұлы.
Жалпы, Батыс Қазақстан облысы бойынша сәуір айынан бері санитарлық тазалық шараларына 131 мыңнан аса тұрғын, 3 мыңнан аса мекеме мен кәсіпорын, 74 мыңға жуық жеке аула қатысқан екен. Өңірде 231 саябақ пен гүлбақтың аумағы тазаланған, 48 мыңнан аса түрлі ағаш көшеті отырғызылған. 1 221 әлеуметтік нысан мен 525 тарихи-мәдени ескерткіш аумағында тазалау жұмысы жүргізілген. Экологиялық айлыққа 1 197 бірлік техника жұмылдырылып, 49 307 тонна қоқыс шығарылыпты.
– Бұл күндері Мемлекет басшысының тапсырмасы бойынша бүкіл елімізде экологиялық акция өтіп жатыр. Бұл – өте маңызды іс-шара. Жақында Астана қаласында болғанымда да осындай іс-шараға тап болып, қатысқан едім. Ал біздің Орал қаламыз елдегі ең жасыл, әдемі қаланың бірі ғой. Биыл өңірде су тасқыны болып, санитарлық тазалық жұмысын дер кезінде жүргізе алмап едік. Сондықтан бұл мәселе біз үшін өте өзекті. Қуанатыным, табиғатты аялайтын белсенді жастардың қарасы көп екен. Туған жерімізді, табиғат анамызды аялай берейік, – дейді еңбек ардагері, «Жаңақала жайсаңдары» қоғамдық ұйымының жетекшісі Еламан Бәденұлы.
Ұйымдастырушылардың айтуынша, шілде айының соңында өңірде «Таза жағалау» акциясы өткізілмек. Оның мақсаты – өзендер мен су айдындарының жағалауын қоқыстан тазарту. Бұл бастама су ресурстары экожүйесін қалпына келтіріп, өзен-көлдің тұрмыстық және өндірістік қалдықтармен ластануын болдырмауға бағытталған. Ал тамыз айында ауылдық елді мекендердің санитарлық жағдайын жақсартуға бағытталған «Таза ауыл» акциясы өтеді. Осы акция шеңберінде ауылдарда жаппай тазалау, сондай-ақ абаттандыру және көгалдандыруға көңіл бөлінеді. «Таза ауыл» акциясы қыркүйек айында да жалғасып, қала мен ауылдағы аулалардың жағдайын жақсартуға ден қойылады. Осы акция аясында ең үздік аулалар арасында байқау өтіп, жеңімпаздар марапатталады.
Батыс Қазақстан облысы