Кеген аудандық тарихи-өлкетану музейінің жалпы экспозициясы өлкенің бай табиғаты мен көне тарихынан сыр шертеді. Музейдің орналасқан ғимараты – 1933-1934 жылдары Кеген аудандық партия комитетінің бірінші хатшысы Ораз Жандосовқа салынған үй.
1987 жылы тарихи-этнографиялық музей болып құрылып, одан кейінгі жылдары Райымбек аудандық тарихи-өлкетану музейі деп аталса, екі ауданның бөлінуіне байланысты 2018 жылдан бастап Кеген аудандық тарихи-өлкетану музейі аталады. Музей қонақтары таулы өңірдің тарихымен қатар, оның қалыптасуына үлес қосқан қайраткерлердің өмір-дерегіне қанығады.
Музейдің ерекше және құнды экспонаттарының тізімінде көрнекті жазушы, қазақ әдебиетінің классигі Бердібек Соқпақбаевтың жеке заттары сақтаулы тұр.
«Нарынқол туып-өскен ауданым-ай,Көркем жер болмас сенің аумағыңдай.Кетерде сенен ұзап көзім қимай,Қызыл тіл өлеңдетіп зауладым-ай», – деп жазушының өзі жырлағандай, Бердібек Соқпақбаев 1924 жылы осы өңірде дүниеге келген.
«Экспозиция залына жазушының өміріне қатысты фотосуреттермен қатар, жеке заттары қойылған. Оларды 2014 жылы қарындасы Несіпқан Соқпақбаева музей қорына табыстаған. Атап айтсақ, балалар әдебиетінің классигі Б.Соқпақбаевтың өзі киген костюмі мен жемпірі, көзілдірігі, қаламсабы мен қолжаттықтырғышы, сағаты да осы музейде сақтаулы», дейді музейдің экскурсия жетекшісі Аяулым Ақымжан.
Алматы облысы