Көктемде су тасқынынан зардап шеккен Батыс Қазақстан облысында осы күндері күн сайын қуаныш. Баспанасы суға кеткен тұрғындар жаңа үй мен пәтерге ие болып жатыр.
Мемлекет басшысы елімізде су тасқынынан зардап шеккен тұрғындарға тиісті көмек көрсетілетінін мәлімдеген еді. Міне, Батыс Қазақстан облысында да су тасқыны салдарынан баспанасы жарамсыз деп танылған жандарға мыңдаған пәтер сатып алынып, 775 тұрғын үй жаңадан салынды.
Өткен аптаның соңғы күндері Бөрлі ауданында су тасқынан зардап шеккен азаматтар баспанамен толық қамтамасыз етілді. Тұрғындардың қуанышына өңір басшысы Нариман Төреғалиев ортақтасты. Айта кетейік, биылғы табиғи апат кезінде Бөрлі ауданында барлығы 126 үй жарамсыз деп танылған еді. Сөйтіп, тұрғындардың өз қалауымен 66 отбасына пәтер сатып алып берілсе, қалған 60 отбасы үшін жаңа тұрғын көтерілді. Нәтижесінде, Ақсу аулында – 23, Кеңтүбек аулында – 11, Пугачев аулында – 12, Аралтал аулында 14 тұрғын үй жаңадан салынды. Құрылыс жұмысы биылғы 22 мамырда басталып, жоспарға сәйкес 1 тамызға дейін аяқталды.
– Мемлекет басшысы Қасым-Жомарт Тоқаевтың тапсырмасына сәйкес су тасқынынан зардап шеккен тұрғындарға заң аясында тиісті көмек көрсеттік. Бүгінде тұрғындарға 100 АЕК көлемінде біржолғы әлеуметтік көмек және бүлінген дүние-мүлік үшін 150 АЕК көлемінде төлем толығымен өтелді. Сонымен қатар су тасқыны кезінде бүлінген үйлердің 90 пайызынан астамына тұрғын үйін жөндеуге және қалпына келтіруге өтемақы берілді. Кеше ғана үйінен айырылып, қайғыда қалған тұрғындар бүгін жаңа баспанаға ие болып жатыр. Қазіргі таңда облысымызда мыңнан аса баспана сатып алынып, су тасқынынан зардап шеккен отбасыларға берілді. Сонымен қатар 775 тұрғын үйдің құрылысы қарқынды жүргізілді. Біз бүгін осындай 60 үйдің халық игілігіне берілу сәтіне куә болып отырмыз, – деді Н.Төреғалиев.
Бөрлі ауданындағы құрылыс жұмыстарына «Ақсайгазсервис» АҚ, «Ақжайық», «Демеу» қорлары және «Qazaq Stroy Almaty» ЖШС демеушілік еткен. Қаржыландырудың жалпы көлемі 1,6 млрд теңгені құрапты.
– Біз Пугачев аулына 2006 жылы отбасымызбен көшіп келіп, үй салып алған едік. Сол үйімізді наурыз айының аяғында тасқын су басты. Дегенмен арада көп уақыт өтпей жаңа баспаналы болып жатырмыз. Жарық, кең, 3 бөлмелі, барлық жағдайы жасалған баспанаға қол жеткізгенімізге өте қуаныштымыз. Осындай қамқорлығы үшін Мемлекет басшысына алғысымды білдіремін, – дейді бүгін қоныстой тойлаушылардың бірі Ақкенже Иманалиева.
Дәл осындай қуаныш Сырым, Бәйтерек аудандарында да болды. Сырым ауданында 14 үй, Бәйтерек ауданында 6 пәтер жоспарлы мерзім ішінде салынып, су тасқынынан зардап шеккен тұрғындарға берілді.
– Біз су тасқынынан зардап шеккендерге заң аясында жан-жақты қолдау көрсетіп, біржолғы әлеуметтік көмек, дүние-мүлік шығыны үшін төлем және бүлінген баспана шығындарын толығымен өтеп отырмыз. Көктемде су апатына тап болып, қиындық көрген халық бүгінде жаңа баспанаға ие болып жатыр. Тамыздың алғашқы екі күнінде 80 үйдің құрылысы аяқталып, тұрғындарға табысталды, – дейді облыс әкімінің орынбасары Тілепберген Каюпов.
Бәйтерек ауданындағы жаңа пәтерлер «Nostrum Oil and Gas» компаниясы мен «Қазақстан халқына» қоғамдық қорының демеушілігімен салынған екен.
– Мемлекеттің қолдауымен барлық қиындық артта қалды. Президентіміз Қасым-Жомарт Кемелұлына алғысымызды білдіреміз. Далада қалмадық. Төрт ай ішінде су жаңа баспанаға қол жеткізіп отырмыз, – дейді тұрғын Жұмажан Жұрымбаев.
Батыс Қазақстан облысы