Азия нарығындағы ең ірі балмұздақ өндіруші, сонымен қатар шетел нарығына отандық балмұздақты жеткізуші болып саналатын «Шин-Лайн» компаниясының жетістігі көп-ақ. Алматы облысының Байсерке аулында орналасқан фабрикада осы күні заманауи балмұздақ өндірісі шоғырланып, сүт өнімдері, мұздатылған жартылай фабрикаттар, қамыр, әртүрлі кеспе шығару жұмыстары жолға қойылған.
Фабрикада әлемдік өндірістегі ең озық қауіпсіздік және тиімділік стандарттарын берік ұстанады. Бәлкім, соның арқасы бүгінде әлемдегі ең мықты 10 балмұздақ өндіруші қатарына кіріп отыр. Кәсіпорында Іле ауданына қарасты 12 ауылдан 5 000-ға жуық адам еңбек етеді.
«Шин-Лайн» шығаратын «Бомба» бренді мен «Мишка на полюсе» сапа бойынша ТМД елдері арасында алдыңғы қатарда. Жалпы, компания желісінде жүзден аса балмұздақ түрі бар. Шығыс колориті бар алғашқы премиум-бренд – «Bahroma» да өз тұтынушыларын тапқан. Ал кондитерлік өнімдер мен балмұздақ сегментінде «Золотая коллекция» желісіне жататын «Гулливер», «Лесная Белочка», «Ключик Буратино», «Птичка» және «Красный мак» балмұздақтары қашанда жоғары сұранысқа ие.
Кәсіпорын тәулігіне 350 тонна өнім шығарады. Жүк айналымы 50 мың паллеттен асатын және 30 градусқа дейін автоматты температура режімі бар толықтай автоматтандырылған қоймалар технологиясы енгізілген. Бұл қоймаларда барлық жұмысты роботтар жасайды.
Озық еуропалық және азиялық технологтермен ынтымақтастықта дайындалған жоба аясында балмұздақ өндірісінің өрісі кеңейіп келеді. Жуырда компания Сауд Арабиясының «Al-alameya Group» компаниясымен сол елде балмұздақ өндіру зауытын салуды қамтитын ынтымақтастық туралы келісімге қол қойды. Іс-шараға қатысқан облыс әкімі Марат Сұлтанғазиев осы серіктестіктің стратегиялық маңыздылығына тоқталып, оның сәтті жүзеге асатынына сенім білдірді.
«Біз қазақстандық серіктестермен ынтымақтасуға қуаныштымыз. Таңдаулы қазақ сүтінен жасалған балмұздақ тұтынушылардың көңілінен шығатынына сенімдіміз», деді «Al-alameya Group» компаниясының иесі Шауки Абдулсатар Абду Сыдық.
Осы ынтымақтастық аясында жасалған балмұздақтың алғашқы партиясы келесі жылы Сауд Арабиясының дүкен сөрелеріне шығарылады деп болжанып отыр.
Алматы облысы