Ерте көктемнен кетпен-күрегін алып, егін еккен аудан диқандарының ала жаздай төккен тері өтеліп, қарқынды еңбектің нәтижесінде Алматы облысы Балқаш ауданында арпа-бидай ору жұмысы өз мерзімінде толық аяқталды.
«Аудан көлемінде биылға 28 570,6 гектар суармалы жерге егін егілген болса, оның 6 696,9 гектарына күріш, 6 144,8 гектарына арпа-бидай, қалған егістік алқапқа көпжылдық шөп егілген. Бүгінде аудан диқандары арпа-бидай егілген егіс алқаптарындағы ору жұмыстарын толық аяқтады», дейді Балқаш аудандық ауыл шаруашылығы бөлімінің басшысы Дархан Төлеубек.
Егіні бітік шыққан шаруашылықтардың бірі – «Агрофирма Бірлік». Бұл серіктестіктің диқандары жұмыла жұмыс істеп, сапалы өнім алудың көшбасынан көрінді. Серіктестіктің 1 360 гектар суармалы жеріне егілген бидай осы күні толық бастырылып, жиналған. Әр гектардан орташа түсім 25,0 центнерден айналды.
Жауапты науқанға шаруашылық бойынша 9 «Енисей – 1200», 3 «ҮТО» комбайндары және 12 «МТЗ – 1221», 2 «ҮТО» тіркемелі тракторлары жұмылдырылған. Механизатор Алмас Амангелді бастаған диқаншылар өскен өнімді төкпей-шашпай шығынсыз жинап алу жолында тыңғылықты жұмыс істеді. «Диқан жерін анасындай сүйеді, жер диқанды баласындай сүйеді» деген. Ең бастысы, ауыспалы егіс алқабының ережесі сақталса, құнарлы топыраққа сіңірілген дәнді-дақыл мол өнім береді», дейді «Агрофирма Бірлік» серіктестігі директорының орынбасары Аршын Жақыпов.
Дала жұмыстары аясында барлық агротехникалық іс-шара өткізілді. Арпа-бидай жинау жұмысы бойынша 6 144,8 гектар алқап толық бастырылып, 10 446 тонна өнім алынды. Орташа түсім әр гектарға 17 центнерден айналды. Жоңышқа ору жұмыстары бойынша екінші орылым аяқталды. Барлығы 88 200 тонна мал азығы дайындалды.
Алматы облысы,
Балқаш ауданы