Сенат депутаты Бибігүл Жексенбай Бас прокуратура ұжымымен кездесті. Басқосу кезінде Мемлекет басшысы Ұлттық құрылтайдың үшінші отырысында белгілеп берген идеологиялық басымдықтар, сондай-ақ «Халық үніне құлақ асатын мемлекет» тұжырымдамасына сәйкес қоғаммен және бұқаралық ақпарат құралдарымен жұмыс мәселелері талқыланды.
Депутат Сенаттың заң шығару қызметі туралы айтып, қоғамдағы өзара құрмет пен сенімді нығайтудың және заң мен тәртіпті сақтаудың маңызды екенін атап өтті.
«VIII сайланған Парламенттің II сессиясы барысында 102 заң қабылданды. Оның үштен біріне депутаттық корпус бастамашы болды. «Қоғамдық бақылау туралы», «Адам саудасына қарсы іс-қимыл туралы», «Масс-медиа туралы», басқа да заңдар азаматтардың құқықтарын қорғауға, сондай-ақ азаматтық қоғамды одан әрі дамытуға арналған. Әйелдер мен балалардың құқықтарын қорғауды көздейтін заңнама күшейтіліп, лудоманиямен күрес шаралары да қабылданды», деді Бибігүл Жексенбай.
Сонымен қатар Парламент депутаты сенаторлар ел Президентінің тапсырмасымен қолға алынған бағдарламалар мен жобаларды іске асыру аясында айтарлықтай жұмыс атқарғанын атап өтті.
«Адам құқықтарын қорғау – жауапты міндет қана емес, сонымен қатар жоғары мәртебе. Осы ретте Мемлекет басшысы белгілеп берген ұлттық құндылықтар құқық қорғау органдары қызметкерлерінің жұмысында негізгі қағидатқа айналады деп сенеміз. Бұл құндылықтар – әр азаматтың құқықтары мен бостандықтарын қорғау кезінде олардың әрекеттері мен тәсілдерін анықтауға, қоғамның сенімін нығайтуға және елде әділ құқықтық кеңістік қалыптастыруға ықпал ететін үлкен күш», деді сенатор.