Елорда төрінде V Дүниежүзілік көшпелілер ойындары өтіп жатыр. Дүбірлі дода барысында қалада этноауылдар жұмысын бастап, әлемнің түкпір-түкпірінен келген қонақтарды қабылдап жатыр, деп хабарлайды Egemen.kz.
«Көшпелілер әлемі» деп аталатын этноауылда тек спортшылар мен қала тұрғындарына ғана емес, кішкентай балақайларға да жағдай жасалған.
Мұнда түрлі жастағы балалар үшін ойын-сауық бағдарламалары ұйымдастырылған. Кішкентай әуесқойлар ұлттық спорт түрілері бойынша, дәлірек айтқанда, тоғызқұмалақ, арқан тартыс, асық ату сынды ойындарды ойнап көре алады.
Этноауылдарда ежелгі дәстүрлердің байлығы мен көшпелі мәдениеттің мәңгілік рухын сезінуге болады. Осының барлығын бақылап жүрген әр балақайдың бойында патриоттық сезім ұлғайып, Отанға, салт-дәстүрлерге, ұлттық спорт түрлеріне деген сүйіспеншілік арта түседі.
Одан бөлек, «Өнер ордасы» аталатын басты сахнада күн сайын 12:00-ден 17:00-ге дейін еліміздің түкпір-түкпірінен келген үздік аймақтық ұжымдар өнер көрсетіп жатыр. Этнофольклорлық ансамбльдер, қазақ ұлттық оркестрлері, солистер және би ұжымдары дәстүрлі этникалық стильде өнерлерін паш етіп жүр.
5-ші Дүниежүзілік көшпелілер ойындары – Қазақстан үшін жылдың ең маңызды оқиғасы. Айтулы іс-шараға әлемнің 89 елінен 2000-нан астам қатысушы атсалысып жатыр.
Еске сала кетейік, елордадағы этноауылдарға кіру және бару тегін. Ал Дүниежүзілік көшпелілер ойындарының спорттық жарыстарына билет бойынша кіруге болады.
Міне, этноауылдағы «балалар әлемі» осындай. Астанада ашылған бес этноауылдың барлығы - кішкентай балақайлар үшін қызықты алаң.