Жаңаөзенді дамыту мәселесі күн тәртібінен түскен емес. Қыркүйек айы басталысымен мұнайлы қалада оқушыларға арналған нысанның іргетасы қалануы да осы мақсат аясындағы іс.
Жаңадан бой көтеретін «Bolashaq Sarayi» оқушылар сарайын қаладағы балалар мен жастардың жан-жақты дамуына барлық жағдай жасалған заманауи білім ұйымы мен мәдени орталық ретінде салу жоспарланған.
– Мемлекет басшысы Қасым-Жомарт Тоқаевтың қабылдауында болған кезде Жаңаөзен қаласында оқушылар сарайын тездетіп салуды тапсырған еді. Сол күннен бастап құрылысқа қатысты жұмыс жүргізіле бастады. Маңғыстаудың болашағы – білімді, креативті жастарымыздың қолында. Нысан жас ұрпақтың шығармашылық қабілетін дамытуға, жаңа мүмкіндіктерді игеруге жол ашады. Бәсекеге қабілетті балаларымыз еліміздің дамуына өз үлесін қосатынына сенімдімін, – деді нысанның іргетасын қалауға қатысқан Маңғыстау облысының әкімі Нұрдәулет Қилыбай.
Маңғыстау облысының 2021-2025 жылдарға арналған әлеуметтік-экономикалық дамуының кешенді жоспары аясында жүзеге асырылып жатқан Оқушылар сарайының құрылысын қаржыландыру «ҚазМұнайГаз» ҰК» АҚ еншілес кәсіпорны «Өзенмұнайгаз» АҚ-ның жеке қаражаты есебінен жүргізіледі.
– Ұлттық компания Жаңаөзен қаласының дамуына, тұрғындарға пайдалы әлеуметтік нысандардың бой көтеруіне мән береді. Биыл сәуір айында ғана паралимпиадашыларға арналған «Алға» спорт кешені ашылды. Компания Жаңаөзен оқушыларына жан-жақты қолдау көрсетеді. «Жарқын болашақ» гранттық бағдарламасы бойынша еліміздің үздік білім орындарында, түрлі өнер колледждері мен спорт мектептерінде білім алуға 600-ден аса грант бөлінді, деді «ҚазМұнайГаз» ҰК» АҚ басқарма төрағасы Асхат Хасенов.
350 орындық ғимараттың ауданы 3 мың шаршы метрді құрайды. Сарайда роботтехника, бағдарламалау, 2D/3D модельдеу, шет тілдері, киім дизайны мен тігін, қолөнер, вокал және халық аспаптарында ойнау кабинеті ашылады. Сондай-ақ жаңартылатын энергия көздері, қолданбалы және жаратылыстану ғылымдарының зертханалары, бейнелеу өнері студиясы, әртістік, журналистика, хореографияға арналған телестудиялар құрылады.
«ҚазМұнайГаз» ҰК» АҚ басқарма төрағасы Асхат Хасеновтің компанияның қалаға әлеуметтік нысандар салуға мән беретінін айтқандығын ескерсек, Жаңаөзенде жақсы істер жалғасын табады деген сенім бар.
Маңғыстау облысы