Алматы облысында жылыту маусымына дайындық жұмыстары қарқынды жүргізіліп жатыр. Бұл туралы Өңірлік коммуникациялар қызметінде өткен брифингте айтылды.
Алматы облыстық энергетика және ТҮКШ басқармасының өкілі Ержан Бейбітұлы облыс бойынша 43 қазандықтың жөндеу жұмыстары аяқталып, олардың қуаттылығы мен тиімділігі артқанын алға тартты.
Іле ауданының Боралдай және Байкен ауылдарындағы қазандықтарды жаңғыртуға қосымша қаржы бөлініп, жұмыстардың 50 пайызы аяқталған. Аталған 5 қазандықтың жұмысы қазан айында толық аяқталады деп жоспарланған.
«Сонымен қатар тұрғындарға қажетті 714 мың тонна көмір жеткізуге келісімшарттар жасалды. Қазіргі уақытта өңірге 125,1 мың тонна көмір жеткізіліп, орташа бағасы тоннасына 18 500-23 000 теңгені құрайды. Көмір сапасы мен қолжетімділігін қамтамасыз ету мақсатында барлық оператор қатаң қадағаланады», деді Ержан Бейбітұлы.
Сондай-ақ өңірде электрмен жабдықтау желілерін жаңарту да белсенді түрде жүзеге асырылып жатыр. 1185 км электр желісін жөндеу жоспарланып, оның ішінде күрделі жөндеудің 85 пайызы, ағымдағы жөндеудің 75 пайызы аяқталған. Бұл шаралар желілердің тозуын 5 пайызға төмендетуге, тұрғындарды тұрақты электр қуатымен қамтамасыз етуге бағытталған.
Ал облыстық Төтенше жағдайлар департаментінің мемлекеттік өрт бақылау басқармасының бас маманы Мирас Нұрбайұлының сөзінше, өрт қауіпсіздігін күшейту мақсатында әлеуметтік осал топтардың үйлеріне көміртегі тотығын анықтайтын 787 датчик орнату жұмыстары жүргізіліп жатыр.
«Бұл шаралар тұрғындардың қауіпсіздігін арттыруға және жылыту маусымының кедергісіз өтуіне бағытталған. Датчиктер әлеуметтік осал топтардың үйлеріне тегін орнатылады. Сонымен қатар тұрғындарға өрт қауіпсіздігі бойынша түсіндіру жұмыстары жүргізіліп жатыр», дейді төтеншелік маман.
Айта кету керек, өңірде қазандықтардың тиімділігін арттыру мен тұрғындардың қауіпсіздігін қамтамасыз етуге бағытталған бұл шаралар қысқы маусымның қиындықсыз әрі кедергісіз өтуіне септігін тигізбек.
Алматы облысы