Батыс Қазақстан облысы Қазталов ауданында 8 отбасы баспаналы болып, аудан орталығындағы спорт кешені мен Қайыңды ауылындағы мәдениет үйі пайдалануға берілді. Қуанышты жиынға облыс әкімі Нариман Төреғалиев қатысты.
Бұдан бұрын облыста «Қаладан – ауылға!» кешенді бағдарламасы қолға алынғанын хабарлаған едік. Қазталов ауданында осы бастама қарқынды жүріп жатыр. Міне, Болашақ ауылдық округінің Жаңатаң және Көпкүтір елді мекендерінде 4 отбасы жаңа баспанаға ие болды.
– Өңірде Мемлекет басшысының тапсырмасымен бірқатар инфрақұрылымдық жоба, мемлекеттік бағдарлама, өңірлік бағдарламалар да жүйелі жүзеге асып жатыр. Соның ішінде «Қаладан – ауылға!» жобасы ауылдарды дамытуға сеп болды, жас отбасыларға да үлкен қолдау. Бағдарлама аясында Қазталов ауданына көшіп келген жас отбасыларды құттықтаймын. Шаңырақтарыңыз берекелі болып, қуаныш пен шаттыққа толсын! — деді облыс әкімі тұрғын үй кілтін салтанатты түрде табыстап тұрып.
Айта кетейік, дәл осы жоба аясында ауданда 16 тұрғын үй сатып алынған. Бүгінге дейін ауылдарға 14 шаңырақ көшіп келіп, орналасыпты. Осы отбасыларда 78 жан болса, соның 50-і бала екен. Барлық отбасы тұрақты жұмыспен қамтылып, мектеп жасындағы 24 бала мектепке, 25 бала балабақшаға орналасқан.
– Біз осы бағдарлама арқылы Жаңатаң ауылына биылғы ақпан айының басында көшіп келдік. Қаладан келген бойда басымызға уақытша тұрғын үй берді, қорамызға сиыр мен қой-ешкі кіргізді. Қазір сол төрт түліктің игілігін көріп отырмыз. Жолдасым Аят екеуміз тұрақты жұмысқа орналастық. Осы үйдің құрылысына да күйеуім өзі атсалысты. Құшақ жая қарсы алған ауыл халқына алғысымыз шексіз, – дейді су жаңа үйге кірген Шынарай Төремұратова.
Қайыңды ауылы аудан орталығына едәуір қашық орналасқан. Ауыл тұрғындары мәдениет ошағы керектігін жиі айтып жүруші еді. Халықтың талап-тілегі орындалып, заман талабына сай рухани кешен есігін айқара ашты. «Ауыл – ел бесігі» бағдарламасы аясында салынған мәдениет үйінде 150 орындық көрермен залы бар, ауылдық кітапхана да осында орналасқан.
– Соңғы жылдары өңірде, аудан-ауылдарда жаңадан білім ордалары мен мәдениет үйлері көп салынып жатыр. Қайыңды ауылындағы мәдениет үйінің жобасын өзге де елді мекендерде жүзеге асырамыз. Алдағы уақытта Қазталов пен Қайыңды бағытында жол салуды да ойластырып жатырмыз, – деп қуантты Нариман Төреғалиев ауыл тұрғындарын.
Жоғарыда аталған 8 үйдің төртеуі қаладан ауылға көшіп келген отбасыларға берілсе, қалған 4 баспана үй кезегінде тұрған мұқтаж азаматтарға табысталды. Жалпы аудан бойынша биыл Президент тапсырмасына сәйкес 28 елді мекенде үй кезегінде тұрған әлеуметтік осал топтағы отбасыларға арнап қос пәтерден 116 үйге қаржы бөлініп, құрылыс жүрген еді. Міне, сол үйлер қазір өз иесін тауып жатыр.
– Бүгін Президентіміз Қасым-Жомарт Кемелұлының бастамасымен ауыл-аймақтарды дамыту бойынша берілген тапсырмасының арқасында баспаналы болдық. Осы бағдарламаның жүзеге асуына атсалысқан барша азаматқа және жаңа баспана салып берген мердігерге ризашылығымды білдіремін, – дейді Қазталов ауылының тұрғыны Арайлым Сансызбаева.
Дәл осы күні аудан орталығында 320 орындық спорт кешенінің құрылысы аяқталып, пайдалануға берілді. Нысанның ашылу салтанатына облыс әкімі Нариман Төреғалиұлы, аудан әкімі Асланбек Сарқұлов, облыстық мәслихат депутаттары Тұрарбек Тілемісұлы, Самат Хамзаұлы, «КПО Б.В.» компаниясы бас директорының орынбасары Мұхтар Манкеев қатысты. Біраз жылдан бері құрылысы тұрып қалған нысанның ақыры халық игілігіне жарағанына ел-жұрт риза. Спорт кешенінде волейбол, футзал, баскетбол ойындарына арналған зал және бокс, дзюдо, күрес, жаттығу залдары бар. Енді бұл жерде ауыл балаларына түрлі спорттық секция ашылып, жұмыс істейді.
Батыс Қазақстан облысы