Оқиға Қарағанды облысында болған, деп жазады Egemen.kz.
28 жастағы анасы полицияға баланың үй ауласынан жоғалып кеткені туралы 3 қазанда кешкі уақытта хабарлаған. Петровка ауылының 5 жасар тұрғыны Бұқар Жырау аудандық Полиция басқармасының бүкіл ұжымын, ТЖД қызметкерлерін, ауылдастарын аяқтан тік тұрғызған. Баланы төрт сағат бойы 400-ден аса адам иттерімен іздеген.
Топтарға бөлінген іздеушілердің жұмысы қараңғы түсіп кеткеннен кейін қиындаған, олар түрлі нұсқаларды пысықтап, баланы барлық жерден іздеген. 4 сағаттан кейін жоғалған бала туған ауылынан 1 шақырым қашықтықта даладан табылған.
«Іздеу жұмыстарына барлығы 400-ден аса адам қатысты. Баланы Петровка ауылынан бір шақырым жерде ауыл тұрғындары мен полиция қызметкерлері тапты. Бұқар Жырау аудандық полиция басқармасының басшылығы іздеуге қатысқан барлық жанашыр азаматқа жедел көмек пен қолдау көрсеткені үшін алғыс білдіреді», деп хабарлады облыстық ПД баспасөз қызметі.