ҚАЗАҚСТАН ХАЛҚЫНА ЖАСАЛҒАН ҚҰРМЕТ

Амман қаласында Елбасы Нұрсұлтан Назарбаевтың атындағы даңғыл салтанатты түрде ашылды Иордания Хашимиттік Ко­роль­дігінің Амман қалалық муни­ци­пал­дық кеңесі Амман қала­сы­ның бір көшесіне Қазақстан Рес­пуб­лика­сы­ның Президенті Нұр­сұл­тан Назар­баевтың  есімін беру туралы шешім шығарған болатын. Кеше Амман қа­ласында Қазақ­стан Республика­сы­ның Прези­денті Нұрсұлтан Назар­баевтың құрметіне берілген даңғыл­дың ресми ашылу салтанаты болды.

Әлисұлтан ҚҰЛАНБАЙ  – Амманнан.

Салтанатты рәсімге Астана қа­ласының әкімі Иманғали Тас­мағамбетов бастаған, құрамында Президент Әкімшілігі Басшы­сы­ның орынбасары Бауыржан Бай­бек, Парламент депутаттары – сенатор Қуаныш Сұлтанов, мә­жі­лісмен Кенжеғали Сағадиев, Мәдениет министрі Мұхтар Құл-Мұхаммед бар қазақстандық де­легация және Амман қаласының басшылары, Иордания Парла­менті­нің депутаттары, Король­діктің жауапты қызметкерлері, осы елде тіркелген бірқатар шетел елшілері, сондай-ақ Амман қаласының тұрғындары қатысты. Ашылу салтанатында Амман қаласының мэрі Омар Маани мен Астана қаласының әкімі Иман­ғали Тасмағамбетов сөз сөйлеп, екі елдің ынтымақтастығы және бауырлас қалалар – Астана мен Амманның арасындағы тығыз байланыстарға тоқталды. Амман қаласының мэрі, муниципалдық кеңес хатшысы және ономастика және тіркеу бөлімінің бастығы қол қойған шешімде былай деп көрсетілген: “Амман қаласының бір көшесіне Қазақстан Республикасының Президенті Нұрсұлтан Назар­баев­тың есімі берілсін”. Ал Қазақстан Республикасының Президенті Нұрсұлтан Назарбаев атындағы даңғыл Сарах әл-Шахид көшесі мен Яджуз көшесінің аралығында орналасқан, ұзындығы – 3500 метр, ені – 40-60 метр. Даң­ғыл­дың екі жағында  мемлекеттік ме­кемелердің ғимараттары, тұрғын үйлер орналасқан. Иорданиялықтардың тәжіри­бе­сінде бауырлас қалалар арасын­дағы өзара ынтымақтастықты ны­ғайту мақсатында ел астанасында өзге мемлекеттердің басшылары атына көше беру бұрыннан бар екен. Қазақстан Президентінің атына көше берілуі қай жағынан алғанда да өте құптарлық жәйт. Оған иорданиялық танымал тұл­ғалармен әңгімелесу барысында анық көз жеткіздік. Жалпы, Ел­ба­сы –  Қазақстан Президенті Нұр­сұлтан Назарбаев Иорданияға бірнеше мәрте сапармен барып қайтқан. Иордания Королі Абдалла ІІ де Қазақстанда бірне­ше рет болған. Сонымен қатар, бүгінде Астана мен Амман бауыр­лас қалалар болып табылады. Ал Қазақстан басшысының атына көше беруге Король әкімшілігі бастамашы болыпты. Бұған дейін Амман қаласында сегіз көше шетел мемлекеттері бас­шыларының атымен аталып келген екен. Олардың ішінде Египеттің бұрынғы президенті Гамаль Әбдел Насер, Сауд Арабиясының Королі Фейсал бен Әбдел Әзиз, Испания Королі Хуан Карлос, Әзірбайжанның бұрынғы президенті Гейдар Әлиев, тағы басқалар бар. Міне, енді Амман қаласындағы тағы бір көрікті көше Қазақстан Респуб­ли­касының Пре­зиденті Нұр­сұлтан Назарбаевтың есімімен аталатын болды. Астана қаласының әкімі Иман­ғали Тасмағамбетов кеше  сондай-ақ Король сарайына барып, Иорда­ния Королі Абдалла ІІ-ге ықылас сапарын жасады. Сонымен қатар, Иманғали Тас­ма­ғамбетов бастаған қазақстандық делегация Амман қаласының мэрі Омар Маанимен кездесті. Ал Парламент депутаттары Қуаныш Сұлтанов пен Кенжеғали Саға­диев Иордания Парламентінің Сенатында, Мәдениет министрі Мұхтар Құл-Мұхаммед осы елдің  Мәдениет министрлігінде болды. Суретті түсірген  Игорь БУРГАНДИНОВ.