Ақжайық ауданы Ақжол ауылдық округіне қарасты Битілеу ауылына Орал қаласынан көпбалалы екі отбасы көшіп келді. Бұл өңірде қолға алынған «Қаладан ауылға» бағдарламасы аясында жүзеге асты.
Шаруасы шалқая бастаған шалғай ауылдарға екінші тыныс беретін бұл бағдарламаның пайдасы көп: елді мекенде тұрғын һәм жұмыс қолы көбейеді, мектепте оқушы саны артады. Келген жанның да есебі түгел: басына үй, қорасына мал бітеді.
Ақжайық ауданының әкімі Мұрат Сердалин жаңа тұрғындар Болат Бекмырзаев пен Бадамша Әбілқайыроваға баспана кілті мен арнайы сертификат табыстады. Ауылдағы «Мұқаш» шаруа қожалығының жетекшісі Алаужан Мұқашев пен «Әлібек» шаруа қожалығының жетекшісі Әлібек Ерғали екі үйелменге бір-бірден ірі қара сыйға тартты.
Әу баста осы бағдарламаны ұйымдастырушылар көпбалалы отбасылардың ауылға келуін мақсат еткен болатын. Шынында, солай болды. Енді Битілеу ауылында түтін түтететін Бекмырзаев әулетінде 4 ұл-қыз болса, Шоқаевтардың 6 баласы бар. Міне, Исатай Тайманұлы атындағы орталау мектептің де шәкірті көбейіп жатыр.
– Осындай игі бастамаға ұйытқы болған облыс басшылығына, жап-жаңа баспанамен қамтамасыз еткен аудан әкімдігіне, ірі қарасын тарту еткен қожалық жетекшілеріне, қуана қарсы алған битілеуліктерге шынайы алғыс айтамын. Бұған дейін басымызда баспана жоқ, қалада пәтер жалдап біраз жыл жүрдік. Әрі балалар кішкентай болған соң үй шаруасымен отырдым. Жолдасымның жалдамалы жұмыстан тапқан нәпақасына күн көретінбіз. Қаладан ауылға көшу туралы ұсыныс түскенде, бәріміз де қуана келістік, – дейді алты баланың анасы, «Күміс алқа» иегері Армангүл Шоқаева.
Битілеу ауылының жаңа тұрғындары кіріп отырған баспананың әрқайсысы 18 млн теңге тұрады. Табиғи газы, таза суы қосылып тұр.
– «Қаладан ауылға» бағдарламасы аясында Ақжайық ауданындағы Сайқұдық ауылына бір отбасы көшіп келді. Тінәлі ауылында екі жеке баспана сатып алынды. Қазір Ақбұлақ ауылында тұрғын үй салу жөнінде кәсіпкерлермен келіссөз жасап жатырмыз, – деді аудан басшысы Мұрат Сердалин.
Батыс Қазақстан облысы