Павлодарда Кеңес Одағының батыры Махмет Қайырбаев туралы жазылған кітаптың тұсауы кесілді. Туынды «Жизнь замечательных людей» сериясымен жарық көрген.
Осы уақытқа дейін «Жизнь замечательных людей» сериясымен 1 500-ден астам еңбек жарық көрген. Соның біразы Қазақстанның көрнекті тұлғаларына арналған. Аталған сериямен шыққан біртуарлар – Шоқан Уәлиханов, Кенесары Қасымұлы, Сәкен Сейфуллин, Құнанбай Өскенбайұлы, Қаныш Сәтбаев, Мұхтар Әуезов, Шәкәрім Құдайбердіұлы, Ермұхан Бекмаханов, Евней Бөкетов, т.б. Енді бұл тізім Махмет Қайырбаев есімімен толығып отыр.
«Махмет Қайырбаев» кітабының авторы – батырдың ұлы Мұрат Қайырбаев. Автор мұрағат материалдарын пайдалана отырып, әкесі Махмет Қайырбаевтың өмірбаянындағы бұрын белгісіз болған фактілерге құқықтық тұрғыдан баға берген.
– Әкемнің өмірбаянын жазу оның өміріндегі кейбір оқиғаларға түрткі болды. Әкем 1982 жылы зейнетке шыққаннан кейін де қоғамдық жұмысқа белсене араласып, майдангерлердің ерліктерін жиі еске алып, жағдайларына алаңдап жүретін. Қазір мен де зейнеткермін. Әкемнің сол кездегі ойға алған жоспарларын жүзеге асыруға аз да болса үлесімді қосқым келеді, – дейді Мұрат Махметұлы.
Бейбіт уақыттағы Махмет Қайырбаевтың еңбек жолы Павлодар облысының дамуымен тығыз байланысты. Тың игеру мен мал шаруашылығын өркендету, облыстың өнеркәсіптік әлеуетін дамытуда қол жеткізген жетістіктері үшін кеңестік мемлекеттік наградалармен марапатталды.
Іс-шарада батыр туралы деректі фильм көрсетіліп, кітап көрмесі ұсынылды.
ПАВЛОДАР